لە خورماتوو دوو شوان رووبەڕووی داعش دەبنەوە و پێشمەرگە فریایان دەکەوێت

 

 

رۆژی یەکشەممە 27-3-2022 جەمال وارانی، فەرماندەی لیوای 144ی پێشمەرگە، بە تۆڕی میدیایی رووداوی راگەیاند، "ئێوارەی دوێنێ دوو شوان لە نێوان گوندەکانی پەلکانەی سەیدان و پەلکانەی سالم و گوندی غەڕە، لەکاتی لەوەڕاندنی ئاژەڵەکانیان رووبەڕووی دوو چەکداری داعش بوونەتەوە".

 

وارانی دەڵێت، شوانەکان زیاتر لە سنووری خۆیان ئاژەڵەکانیان بردووەتە پێشەوە. دەشڵێت: "لەگەڵ چەکدارانی داعشدا رووبەڕووی یەک بوونەتەوە و ماوەیەک تەقەکردن روویداوە، دواتر هێزەکانمان بەهانایانەوە چوون و رزگاریان کردوون".

 

فەرماندەی لیوای 144 پێشمەرگە باسی لەوەشکرد، شوانەکان بەوانیان گوتووە، 100 سەر ئاژەڵیان نادیارە و گوتی: "ئەمڕۆ هەوڵێک دەدەین بۆ سۆراخکردنیان".

 

جەمال وارانی ئاماژەی بەوەکرد، چەکدارانی داعش لە سنوورەکەیان کەمیان کردووە و دوو کەس و سێ کەس دەبیندرێت، گوتیشی: "دوای ئۆپەراسیۆنێکی فراوانی هێزەکانی پێشمەرگە لە سنووری گوندەکانی ناوچەکە، کە 8-12-2021 دەستیپێکرد و نزیکەی 25 رۆژی خایاند، داعش بەتەواویی لاوازکراون، چونکە شوێنی مانەوە و کۆگاکانیان هەمووی لەلایەن هێزەکانی پێشمەرگەوە لەنێوبران".

 

دوای رووداوەکانی 16ی ئۆکتۆبەری ساڵی 2017، لە ناوچە ناکۆکی لەسەرەکان، بە درێژایی  زیاتر لە 500 کیلۆمەتر بۆشایی ئەمنی لەنێوان هێزەکانی پێشمەرگە و سوپای عێراق دروستبووە، داعش چەندینجار لەو ناوچانە هێرشی کردووەتە سەر پێشمەرگە، سوپا و حەشدی شەعبی.