جارێکی دیکە ئاگر لە بازاڕی چەلێی دهۆک کەوتەوە

ئاگرەکە نیوەڕۆی 26ـی ئایار کەوتەوە. بێوار عەبدولعەزیز، گوتەبێژی بەرگریی شارستانیی دهۆک بە تۆڕی میدیایی رووداوی گوت: "شۆرتێکی کارەبا دروستبووە، ئامێری کارەباکە خۆی سووتاوە و هیچ زیانێکی دیکەی گیانی و مادیی نەبووە".

 

بەرگریی شارستانیی دهۆک دەڵێت، پێش تەشەنەکردنی ئاگرەکە تیمەکانیان کۆنترۆڵیانکردووە.

 

ئەوە لەکاتێدایە، یەکی نیسانی 2024، ئاگر لە بازاڕی چەلێ کەوتەوە، کە بازاڕێکی میللیی دهۆکە و زیانی مادیی زۆری لێکەتەوە، کە سووتانی نزیکەی 160 دووکان و 20 کۆگە بوون.

 

بەگوێرەی ئاماری حکومەتی هەرێمی کوردستان، ئەم ساڵ تاوەکو 21ـی ئایار، زیاتر لە هەزار و 292 رووداوی ئاگرکەوتنەوە و خنکان و هەڵدێران روویانداوە؛ بەهۆیانەوە 61 کەس گیانیان لەدەستداوە.