هاووڵاتییەکی خەڵکی نایجیریا لە شاخێکی هەرێمی کوردستان هەڵدێرا و گیانی لەدەستدا

 

 

رووداوەکە دەوروبەری کاژێر 17:00ی ئەمڕۆ هەینی روویداوە.

 

رابەر حەسەن، گوتەبێژی پۆلیسی راپەڕین بە تۆڕی میدیایی رووداوی راگەیاند، "ئەو کەسەی گیانی لەدەستداوە ناوی عەبدولمەجید نیامۆت و تەمەنی 58 ساڵە".

 

ئەو کەسە به رەچەڵەک نایجیریە و بە گوتەی شایەتحاڵەکان بۆ رووداو، لە شاخ هەڵدێراوە، شوێنەواری برین بەسەر جەستەیەوە هەیە، تەرمەکە گواستراوەتەوە بۆ نەخۆشخانەی گشتی قەڵادزێ و لەوێشەوە بۆ پەیمانگای دادوەریی سلێمانی بەڕێکراوە بەمەبستی زانینی هۆکاری راستەقینەی گیانلەدەستدانی.

 

هەروەها گوتەبێژی پۆلیسی راپەڕین گوتیشی، ئەو کەسە لەگەڵ 8 کەسی دیکە وستویانە لە وڵاتی ئێرانەوە بە نایاسایی بێنە هەرێمی کوردستانەوە.

 

8 کەسەکەی دیکە لە لایەن پۆلیسی فریاکەوتنی پشدەر دەستگیرکراون کە 7یان بە رەچەڵەک بەنگلادیشین و ئەوەی دیکەیان نایجیریە.