خولی فێربوونی کاری دەستی بۆ دەرچووانی بەشەکانی گەشتیاری و هونەرەجوانەکان دەکرێتەوە

 

 

خولەکەی دەستەی گەشتوگوزاری بە هاوئاهەنگیی رێکخراوی UNDP و رێکخراوی USAID دەکرێتەوە، تێیدا فێرخوازان فێری کاری دەستی دەکرێن، لە نموونەی رستن و چنین، دروستکردنی مافوور، ئەو بەرهەمانەی بە گەچ یان دار دروست دەکرێن، کەرەستەی جوانکاریی ژنان و کەرەستەکانی نێو ماڵ.

 

ئیبراهیم عەبدولمەجید، بەڕێوەبەری راگەیاندنی دەستەی گەشتوگوزاری هەرێمی کوردستان ئەمڕۆ سێشەممە 26-03-2024 بە تۆڕی میدیایی رووداوی گوت، ئامانجیان پێگەیاندنی دەستی کاری نێوخۆیە بۆ بەرهەمە دەستییەکان، کە ئێستا ئەو بەرهەمانە لە چین و دەوروبەرەوە هاوردە دەکرێن.

 

بەڕێوەبەری راگەیاندنی دەستەی گەشتوگوزار دەشڵێت، "بۆ نموونە قەڵای هەولێر یان مۆزەخانەی ئەمنەسوورەکەی سلێمانی بە کاری دەستی کراون و لە چینەوە هاوردە دەکرێن. ئێمە دەمانەوێت لەمەودوا ئەوانە بە دەستی نێوخۆ دروستبکرێن."

 

خولەکە بۆ دەرچووانی بەشەکانی گەشتوگوزار و هونەرە جوانەکانە و پێنج رۆژ دەخایێنێت. دوایین کات بۆ پێشکێشکردنی داواکاری 31ی ئەم مانگەیە.

 

ئیبراهیم عەبدولمەجید گوتی، تێچووی هاتووچۆ بۆ بەشداران دابین دەکەن و دوای خولەکەش ئاسانکاری بۆ بەشداربووان دەکەن تاوەکو لە شوێنێکی گەشتیاری کار بکەن و بەرهەمەکانیان بە بازاڕ بکەن.

 

لە کۆتایی خولەکەدا پێشانگەیەکی کارە دەستییەکان بۆ بەشداربووان دەکرێتەوە و بڕوانامەیان پێدەدرێت. بە گوتەی بەڕێوەبەری راگەیاندنی دەستەی گەشتوگوزار، دوای خولەکە ناوی بەشداربووان لە دەستەکەیان تۆمار دەکەن بۆ دڵنیابوون لە بەردەوامییان لە کارە دەستییەکان.

 

ئیبراهیم عەبدولمەجید ئاماژەی بەوەشکرد، خولەکە لە شارەکانی هەولێر، سلێمانی، دهۆک، هەڵەبجە، کەلار، رانیە، زاخۆ و سۆران دەکرێتەوە.

 

ئەوانەی دەیانەوێت بەشداری لە خولەکەدا بکەن، دەتوانن لەم بەستەرەوە فۆڕمی بەشداربوون پڕبکەنەوە.