لە باکووری کوردستان بەفر رێگەی هەزار و 745 گوند و کێڵگەی کشتوکاڵی داخست

 

 

ئەنجوومەنی پارێزگاکانی وان، قەرس، ئاگری، ئەردەخان، ئەرزەڕۆم، ئەرزینجان، چەولیگ و دێرسم لە باکووری کوردستان، بەهۆی بەفربارین و شەپۆلی سەرما و سۆڵە بۆ ماوەی یەک رۆژ پشووی خوێندن راگەیێندرا. 

 

ئەمڕۆ دووشەممە 25ـی کانوونی یەکەم، لەو هەشت پارێزگایەی باکووری کوردستان و لە پارێزگاکانی بایبورت، گیرەسوون، کارابوک، ئارتڤین و کاستامۆنوی تورکیا دەرگای قوتابخانە سەرەتایی و ناوەندییەکان نەکرانەوە. 

 

هەروەها کارمەندانی کەمئەندام و دووگیان و ئەوانەش کە تەمەنیان لە سەرووی 60 ساڵە، ناچنە سەر کار و بە مۆڵەتی کارگێڕی بۆیان هەژمار دەکرێت.

 

بەهۆی بارینی بەفرێکی زۆر لە پارێزگاکانی باکووری کوردستان، ئەمڕۆ دووشەممە لە پارێزگاکانی ئەرزەڕۆم، قەرس، دێرسم، ئەردەخان، وان، جۆلەمێرگ، بەدلیس و مووش رێگەی هەزار و 745 گوند و کێڵگەی کشتوکاڵی داخران.

 

بەهۆی نالەباری کەش و هەوا و بەستنی رێگەکان، هۆشداری بە هاووڵاتییان دراوە بەتایبەتی شوفێرانی بارهەڵگر، نەچنە دەرەوە و رێگە سەرەکییەکان بەکارنەهێنن.