سوودانى: وەزارەتى دەرەوە راسپێردراوە بەدواداچوون بۆ هەڕەشەکانى ئیسرائیل لەسەر عێراق بکات
رووداو دیجیتاڵ
محەممەد شیاع سوودانى دەڵێت، "رژێمى زایۆنى بە پاساوى بێ بنەما، هەڕەشەى لە عێراق کردووە و ئەوەش وایکرد، ئێمەش جەخت لەوە بکەینەوە کە نابێت عێراق بکرێتە شوێنێک هیچ هێرشێکی لێوە بکرێت. داوامان لە وەزارەتى دەرەوەش کردووە بەدواداچوون بۆ دۆسیەى هەڕەشەکەى زایۆنى بکات."
محەممەد شیاع سوودانی، سەرۆکوەزیرانى عێراق دەڵێت، "نێردە دیپلۆماسییەکانمان راسپاردوون بۆ ئەوەى رۆڵى کارا بگێڕن لە روونکردنەوەى هەڵوێستى عێراق کە بریتییە لە پارێزگاریکردن لە بنەماکانى و گەرەنتیکردنى بەرژەوەندیی باڵاى وڵات."
ئەو گوتارەى سوودانى لە رێوڕەسمى یادى 100 ساڵەى دامەزراندنى وەزارەتى دەرەوەى عێراق بوو، کە 24ـی تشرینى دووەم لە بەغدا سازکرا.
محەممەد شیاع سوودانی گوتى، "رژێمى زایۆنى بە پاساوى بێ بنەما، هەڕەشەى لە عێراق کردووە کە ئاماژە بوون بۆ ویستە دوژمنکارییەکەى. ئەوەش وایکرد ئێمە جەخت لەوە بکەینەوە نابێت عێراق بکرێتە شوێنێک بۆ ئەوەى هیچ هێرشێکی لێوە بکرێت. داوامان لە وەزارەتى دەرەوە کردووە بەدواداچوون بۆ دۆسیەى هەڕەشەى زایۆنى لە کۆمەڵگەى نێودەوڵەتى بکات بۆ رێگرى لە هەوڵەکانى بۆ هەڵگیرسانى جەنگ بەشێوەیەکى بەرفراوانتر لە ناوچەکەدا."
18ـی تشرینى دووەمی 2024، گیدیۆن سار، وەزیری دەرەوەی ئیسرائیل لە نامەیەکدا داواى لە ئەنجوومەنی ئاسایشی نەتەوە یەکگرتووەکان کرد گوشار بخاتە سەر حکومەتی عێراق بۆ ئەوەی کۆتایی بە هێرشی گرووپە چەکدارەکانی لایەنگری ئێران بۆ سەر ئیسرائیل بهێنێت.
سەرۆکوەزیرانى عێراق رایگەیاند، "لەگەڵ دەستبەکاربوونى ئەم حکومەتە، کارمان لەسەر بەهێزکردنى پەیوەندییەکان لەگەڵ وڵاتانى جیهان و ناوچەکە کرد." و گوتیشى، "رێگەى گەشەپێدانمان دەستپێکرد، کە ئاماژەیە بۆ پەیامێکى دیپلۆماسیی عێراقى، بەر لەوەى ئابوورى بێت."