کەجەکە: پێویستە هەڵوێستی پارتی لەبارەی هێرشەکانی تورکیا روون بێت

 

هاوسەرۆکایەتیی کۆنسەی بەڕێوەبەری کەجەکە ئاماژەی بەوەدا کە بێدەنگیی هەندێک لە هێزە کوردییەکان لە سەروویانەوە پارتی دیموکراتی کوردستان، "بە واتای رەوایەتیدان و پەسندکردنی ئەو هێرشانەیە." دەشڵێت، "گەلی کورد چاوەڕێی هەڵویستی روونی پارتی دیموکراتی کوردستانە."

 

راگەیێندراوەکەی هاوسەرۆکایەتیی کۆنسەی بەڕێوەبەریی کۆما جڤاکێن کوردستان- کەجەکە ئەمڕۆ یەکشەممە بڵاوکراوەتەوە تێیدا هاتووە، "دەوڵەتی تورکیا پشتیوانی و پەسندیی هێزە نێودەوڵەتییەکانیان وەرگرت، بێدەنگیی هەندێک لە هێزە کوردییەکان لە سەروویانەوە پارتی دیموکراتی کوردستان، بە واتای رەوایەتیدان و پەسندکردنی ئەو هێرشانەیە. لە هەر جێگەیەکەوە هێرش بکرێتە سەر کوردان، پێویستە هێزە سیاسییەکان و گەلی کورد ناڕەزایەتیی نیشان بدەن."

 

کەجەکە ئاماژەی بەوە کردووە، کاتێک هێرش کرایە سەر باشووری کوردستان یان شوێنەکانی دیکە، "پەکەکە، گەریلا و گەلی کورد دەستبەجێ هەڵویستیان نیشاندا و بەرامبەری وەستانەوە، ئەوەش واتای ئەوەیە، لە بەرامبەر هێرشێکی بەو شێوە بەرفراوانەدا، پارتی بە ئاشکرا بەرامبەری نەوەستاوەتەوە."

 

ماوەی سێ رۆژە هێرشی فڕۆکەکانی تورکیا و جموجۆڵی سەربازیی سوپای تورکیا لە ناوچە سنوورییەکانی سەر بە ناحیەی کانی ماسێ بەردەوامە، تاوەکو کاژێر 04:00ـی بەرەبەیانی رۆژی یەکشەممەش بۆردوومان و شەڕی فڕۆکە بەردەوامبوو. تورکیاش لە سێ قۆڵەوە چووە زناری کێستە و هێزەکانی لەو ناوچەیە جێگیر کردووە.

 

وەزارەتی بەرگریی تورکیاش ئەمڕۆ ڤیدیۆی بۆردوومانی بارەگاکانی پەکەکەی بڵاوکردووەتەوە لە چوارچێوەی ئۆپەراسیۆنی چڕنووکی برووسکە - چڕنووکی هەورەتریشقە و دەڵێت، هێزەکانیان چوونەتە نێوجەرگەی پێگەکانی پەکەکە و ئۆپەراسیۆنەکە بەردەوامە. 

 

لە راگەیێندراوی کەجەکەدا کەجەکەدا باس لەوە کراوە کە "چاوەڕوانیی گەلی کورد ئەوەیە پارتی لە بەرامبەر داگیرکارییەکان هەڵوێستێکی روونی هەبێت، چونکە لەسەر ئەم بنەمایەدا تورکیا رەوایەتی پێدەدرێت و بە بێدەنگی خۆی لە بەرامبەر هێرشەکان ئەو داگیرکارییە پەسند دەکات و پشتیوانیی لێدەکات، ئەگەر پارتی و هێزە سیاسییەکانی کورد بەرامبەر ئەو هێرشانە بووەستنەوە، تورکیا ناتوانێت لە ئاستی نێودەوڵەتیدا پشتیوانی وەرگرێت و لەم ئاستەدا هێرش بکات."