سامانە سرووشتییەکان: زیاتر لە 370 هەزار خێزان نەوتیان وەرگرتووە

 

 

ئەمڕۆ پێنجشەممە، 24ی تشرینی یەکەمی 2024، وەزارەتی سامانە سرووشتییەکان رایگەیاند: "تائێستا نزیکەی 75 ملیۆن لیتر نەوت بەسەر 373 هەزار خێزان دابەش کراوە، کە دەکاتە نزیکە 35% کۆی نەوتی دابەشکراو."

 

ئاری کاکەشین، بەڕێوەبەری دابەشکردنی سووتەمەنیی هەولێر بە تۆڕی میدیایی رووداوی راگەیاند، تائێستا 33 ملیۆن لیتر نەوتیان لە سنووری پارێزگاکە دابەشکردووە و بەردەوام دەبن تاوەکو هەموو خێزانێک نەوت وەردەگرێت.

 

ئاری کاکەشین گوتی: "ئەگەر وەرزی سەرما درێژەی کێشا و حکومەتی عێراق هاوکار بوو، دەتوانین نەوتی دیکەش دابەش بکەین، زیاد لە پێویست نەوتمان لەبەردەستە."

 

دوێنێ چوارشەممە، 23ی تشرینی یەکەم، سەرباز کەریم، گوتەبێژی مەیدانی سووتەمەنیفرۆشانی هەولێر بە تۆڕی میدیایی رووداوی گوت: "چەند رۆژێک پێش ئێستا بەرمیلێک نەوت بە کۆ 138 هەزار دینار بوو، ئێستا بووە بە 148 هەزار دینار، ئێستا بەرمیلێک نەوت بە نزیکەی 160 هەزار دینار دەگاتە دەست هاونیشتمانیان."

 

گوتەبێژی مەیدانی سووتەمەنیفرۆشانی هەولێر، هۆکاری بەرزبوونەوەی نرخی نەوتی بۆ دابەزینی پلەی گەرما گەرما گەڕاندەوە.

 

هەرێمی کوردستان پێویستی بە زیاتر لە 268 ملیۆن لیتر نەوتە، تاوەکو ئێستا زیاتر لە 74 ملیۆن لیتر نەوت بەسەر پارێزگا و ئیدارە سەربەخۆکاندا دابەشکراوە.

 

بەگوێرەی دوایین راگەیێندراوی وەزارەتی سامانە سرووشتییەکان، ساڵی رابردوو دابەشکردنی نەوت تاوەکو 27ـی ئاداری ئەمساڵ بەردەوام بووە، لەو ماوەیەدا لە هەولێر 153 هەزار و 422 خێزان، دهۆک 77 هەزار و 899 خێزان، لە سلێمانی و هەڵەبجەش 120 هەزار و 200 خێزان بەشە نەوتیان وەرگرت.