دوای راپۆرتێکی رووداو، سەرۆک بارزانی هاوکاریی ماڵباتێکی کۆبانی دەکات

 

 

عەبدولسەلام تەمەنی 33 ساڵ بوو، باوکی چوار کچە، کە گەورەکەیان تەمەنی هەشت ساڵ و بچووکەکە دوو ساڵانە، هیوا حوسامەدین، پەیامنێری رووداو لە کەرکووک لەسەر رەوشی هاوژین و چوار کچەکەی عەبدولسەلام راپۆرتێکی کرد.

 

مەریەم حوسێن، هاوژینی عەبدولسەلام داوای لە سەرۆک بارزانی کرد هاوکارییان بکات لە پێدانی ئیقامە.

 

ئەمڕۆ دووشەممە، مەریەم حوسێن بە رووداوی راگەیاند، "دوای ئەو راپۆرتە خەڵکێکی زۆر پەیوەندییان پێوەکردین و هاوکارییان کردین و لە خەمی ئێمەدا بوون، بۆیە دەڵێم دڵتان لە لای ئێمە نەبێت چونکە نووسینگەی سەرۆک مەسعود بارزانی هاتە سەر هێڵ و کێشەکەی بۆ چارەسەر کردم، ئێستا ئێمە خاوەن ئیقامەی خۆمانین و دەتوانم لەگەڵ تەرمی هاوژینەکەم بچمەوە کۆبانی و بێمەوە باشووری کوردستان، دەمەوێت سوپاسی سەرۆک بارزانی بکەم بەڕاستی باوکێکی میهرەبانە".