لە زاخۆ پیاوێکی تەمەن 70 ساڵ بە دەستڕێژی گولـلە کوژرا

 

 

ئەمڕۆ سێشەممە، 22ی تشرینی یەکەمی 2024، ئەحمەد رەمەزان، گوتەبێژی پۆلیسی زاخۆ بە تۆڕی میدیایی رووداوی راگەیاند، " دوێنێ دووشەممە، 21ی تشرینی یەکەم، کاژێر 6:30ی شەو لە رووداوێکی تەقەکردندا لە گوندی زرێزەی سنووری قەزای باتیفا پیاوێک لە ناو باخەکەی خۆیدا کوژرا." 

 

گوتەبێژی پۆلیسی زاخۆ گوتی: "کوژراوەکە ناوی (ع. ی. ئـ) تەمەن 70 ساڵە، لەناو باخەکەی خۆیدا کوژرا، خێزانەکەی و برای خێزانەکەشی لەوێ بوون، تیمەکانمان دەستیان بە لێکۆڵینەوە کردووە، بەڵام تاوەکو ئێستا هۆکارەکەی دیار نییە."

 

ئەحمەد رەمەزان گوتی، ئێستا تیمەکانی نەهێشتنی تاوانی باتیفا و بنکەی پۆلیسی بێگۆڤا، بەپێی مادەی 405 یاسای سزادان دەستیان بە لێکۆڵینەوە کردووە؛ "شوێنی چوار گولـلە بەسەر جەستەی کوژراوەوەیە و تەرمەکەی رەوانەی پزیشکی دادی کراوە."