بەهۆی شەڕی تورکیا و پەکەکە دوو گەشتیار لە باتیفا دەکوژرێن

 

ئەمڕۆ یەکشەممە 22-08-2021، یوسف مووسا، پەیامنێری رووداو لە زاخۆ رایگەیاند: دوو گەشتیاری عەرەب بەناوەکانی ئەحمەد شوکر، لەدایکبووی ساڵی 1981 و یوسف عومەر، لەدایکبووی ساڵی 1995، کە بە مەبەستی گەشت و سەیران چوونەتە ناوچە گەشتیارییەکانی سنووری ناحیەی باتیفا لە تۆپبارانێکدا دەکوژرێن.

 

زەید ئیبراهیم، هاوڕێی ئەو دوو کەسەی کە لە تۆپبارانەکەدا کوژران بە تۆڕی میدیایی رووداوی راگەیاند، مۆبایلی دوو هاوڕێکەی لە دوو رۆژ پێش ئێستاوە داخراون و ئەوان لە رێگەی رووداوەوە زانیویانە کە هاوڕێکانیان کوژراون.

 

بە گوتەی فەرهاد مەحموود، "دوێنێ شەممە کەسوکاری ئەو دوو گەنجە لە موسڵەوە هاتوون هێزە ئەمنییەکانیان ئاگادار کردووەتەوە، کە دوو کەسیان هاتوونەتە ناوچەکە و بێسەروشوێنن، دوای ئاگادارکرانەوەیان ئێمەش هێزە ئەمنییەکانمان ئاگادار کردەوە، بۆ ئەوەی ئەگەر زانیارییان لەسەر ئەو گەنجانە هەبێت، ئەبوو موختاری گوندی پانک پەیوەندیی پێوەکردین و پێی راگەیاندین کە تۆپێک بەر ئۆتۆمبێلێک کەوتووە و دوو کەسی تێدا کوژراوە، دوای ئەوەی ئاگادارکراینەوە لەگەڵ لایەنی پەیوەندیدار بۆ ئەوەی بێین و بتوانین تەرمەکانیان بهێنینەوە، ئێستاش چاوەڕێی خێزان و کەسوکارەکانیان دەکەین بۆ ئەوەی بزانین تەرمەکان هیی ئەوانن یان نا، تاوەکو تەرمەکانیان رادەست بکەینەوە".

 

سەبارەت بە چۆنێتیی گیانلەدەستدانیان، بەڕێوەبەری ناحیەی باتیفا گوتی: "کەس لەو شوێنە نەبووە تاوەکو بزانرێت چۆن کوژراون، بەڵام ئەوەی بە چاو بینراوە تۆپێک بە نزیک ئۆتۆمبێلەکەیان کەوتووە، بەڵام دیار نییە لە چ لایەنێکەوە ئەو تۆپەیان ئاراستەکراوە و کوژراون".

 

لەبارەی کاتی رووداوەکەش فەرهاد مەحموود دەڵێت: "بەپێی زانیارییەکان ئەو دوو کەسە رۆژی هەینی سەردانی ناوچەکەیان کردووە، ئێمەش دوێنێ پێمانزانی ئەویش دوای ئەوەی کەسوکارەکانیان بەدواداچوونیان بۆ کرد".

 

لە وەڵامی پەیامنێری رووداو، لەسەر ئەوەی بۆچی بازگەکان ئاگاداری ئەو گەنجانەیان نەکردووەتەوە کە ناوچەکە قەدەخەکراوە، بەڕێوەبەری ناحیەی باتیفا گوتی: "دوای بازگەکە گوند دێت لە دەوروبەری گوندیش چەندین ناوچەی گەشتیاری هەن، لەسەر ئەو رێگەیە، بەڵام ئەوانە شارەزا نەبوون و لەسەر رێگەکە بەردەوامبوون و چوونەتە ناوچە قەدەخەکراوەکە".