کشتوکاڵی دهۆک: دەرمانمان بۆ دارسێوەکانی بەرواری باڵا دابینکرد

 

ئەحمەد جەمیل، بەڕێوەبەری گشتیی کشتوکاڵی دهۆک رۆژی دووشەممە بە تۆڕی میدیایی رووداوی گوت، "670 لیتر دەرمانی قڕکەری (فيوژن 10) دابینکراوە بۆ دەڤەری بەرواری باڵا و بێ بەرامبەر لەلایەن بەڕێوەبەرایەتییەکەمانەوە دەدرێتە جووتیاران".

 

سێوی بەرواری باڵا لە هەرێمی کوردستان بەناوبانگە. دوێنێ بەڕێوەبەری گشتیی کشتوکاڵی دهۆک بە رووداوی گوت، ئەم ساڵ نەخۆشیی لەنێو دارسێوەکاندا بڵاوبووەتەوە و ئەوەش کاریگەری لەسەر بەرهەمەکەی دەبێت.

 

گۆڕانی کەشوهەوا بە هۆکاری سەرەکیی نەخۆشی دارسێوەکان دادەنرێت. نەخۆشی "جەرب" و "دروستبوونی کرم" لە دارسێوەکان لە نەخۆشییە دیارەکانی بەشێکی دارسێوەکانی بەرواری باڵایە. بەڕێوەبەری کشتوکاڵی دهۆک گوتی، دەرمانەکە بۆ چارەسەرکردنی نەخۆشییەکە و لەنێوبردنی کرمەکانە.

 

پێشتر بەرهەمی ساڵانەی سێوی بەرواری باڵا دەگەیشتە نزیکەی 7 هەزار تۆن، بەڵام چەند ساڵێکە بەرهەمەکەی بۆ نزیکەی نیوە دابەزیوە. ساڵی رابردوو بەرهەمی سێوی ئەو دەڤەرە لەنێوان سێ هەزار و 500 بۆ 4 هەزار تۆن بوو. ئەحمەد جەمیل گوتی، پێشبینی دەکەن بەرهەمی ئەم ساڵیش بگاتە ئاستی ساڵی رابردوو.

 

بەشێکی سێوی بەرواری باڵا لە پارێزگای دهۆک لە نێوەڕاستی تەممووز بۆ سەرەتای ئاب پێدەگات و بەشەکەی دیکەی دەکەوێتە مانگەکانی 10 و 11ـی ساڵ.

 

بەپێی ئامارەکانی بەڕێوەبەرایەتیی باخداریی دهۆک، لە سەرانسەری دهۆک نزیکەی 700 هەزار داری سێو هەن و ساڵانە 20 بۆ 25 هەزار تۆن سێو بەرهەمدەهێنن.