شەپۆلێکی بارانبارین هەرێمی کوردستان دەگرێتەوە

رۆژی شەممە، 22ـی نیسانی 2023، کەشناسیی هەرێمی کوردستان بڵاویکردەوە، سبەی یەکشەممە، ئاسمان هەور و نیمچە هەور دەبێت لەگەڵ بارینی کەمێک نمەباران و هەورە برووسکە، بەتایبەت لە سنووری سلێمانی و هەڵەبجە.

 

ئاراس جەبار، شارەزای کەشناسی ئەمڕۆ شەممە بە تۆڕی میدیایی رووداوی گوت، سبەی لە سنووری سلێمانی، هەڵەبجە، کەرکووک و گەرمیان باران دەبارێت و لە هەندێک شوێن بارانی "بەلێزمە" دەبارێت. گوتیشی: "لە پارێزگاکانی هەولێر و دهۆک کەشوهەوا سەقامگیر دەبێت".

 

ئاراس جەبار ئاماژەی بەوەشکرد، رۆژی دووشەممە شەپۆلی بارانبارین فراوان دەبێت و تەواوی هەرێمی کوردستان دەگرێتەوە. گوتیشی: "لە هەموو شوێنەکان باران دەبارێت بە رێژەی جیاواز؛ تاوەباران لە هەندێک شوێن دەبارێت کە رەنگە لە کاژێرێکدا 20 ملیمەتر ببارێت، بەڵام لە هەندێک شوێنی دیکە لاواز دەبێت؛ بارانی ئەم وەرزە هەروایە".

 

لە راگەیێندراوەکەی کەشناسیی هەرێمی کوردستاندا هاتووە، جگە لە سلێمانی و هەڵەبجە کە بەراورد بە ئەمڕۆ پلەی گەرما "کەمێک" دادەبەزێت، لە پارێزگاکانی دیکە یەک بۆ دوو پلە، پلەی گەرما بەرز دەبێتەوە.

 

بەگوێرەی کەشناسیی هەرێمی کوردستان، بەرزترین پلەی گەرمای پێشبینی کراو بۆ سبەی یەکشەممە لە باشووری کوردستان بەمشێوەیەی خوارەوە دەبێت: 

 

- هەولێر؛ 26 پلەی سیلیزی

- سلێمانی؛ 23 پلەی سیلیزی

- دهۆک؛ 25  پلەی سیلیزی

- کەرکووک؛ 29 پلەی سیلیزی

- هەڵەبجە؛ 24 پلەی سیلیزی

- زاخۆ؛ 26 پلەی سیلیزی

- سۆران؛ 22 پلەی سیلیزی

- گەرمیان؛ 31 پلەی سیلیزی