بە فڕۆکەی بێ فڕۆکەوانی تورکیا سێ بەرپرسی نێوخۆیی یەپەژە لە کۆبانێ کوژران

 

روانگەی چاودێری مافەکانی مرۆڤ لە سووریا رایگەیاند کە تورکیا بە درۆن لەڕێگەی گوندی ئیدق -  تەختک لە باشووری کۆبانێ ئۆتۆمبێلێکی کردووەتە ئامانج کە سێ ئەندامی یەکینەکانی پاراستنی ژن (یەپەژە)ی تێدابووە. هەروەها میدیای نزیک لە بەڕێوەبەرایەتیی خۆسەر راگەیاند کە لەسەر رێگەی ئیدق - تەختک لە کۆبانێ ئۆتۆمبێلێک لەلایەن درۆنی تورکیا کراوەتە ئامانج .

 

یەکینەکانی پاراستنی ژن (یەپەژە) ناسنامەی ئەو سێ کەسەیان بڵاوکردەوە کە لە هێرشەکەدا کوژراون و رایگەیاند ئەوان کاتێک بەر هێرشەکە کەوتوون لە ئەرکی خۆیاندا بوون و بە فڕۆکەی بێ فڕۆکەوان لێیان دراوە و کراونەتە ئامانج. 

 

 

 

هەروەها پارتی یەکێتیی دیموکرات (پەیەدە) لە راگەیێنراوێکدا سەرکۆنەی هێرشەکەی تورکیا لە کۆبانێ دەکات و دەڵێت، "ئەو هێرشە لە دژی ژنانی ئازاد کراوە" و داوا لە کۆمەڵگەی نێودەوڵەتیی دەکات "سنوورێک بۆ هێرشەکانی تورکیا دابنێت و بیانوەستێنێت."

 

ئەو سێ کەسە لە رۆژی 20-4-2022 لە هێرشێکی فڕۆکەی بێ فڕۆکەوانی تورکیادا لە کۆبانێ کوژران و ئەمڕۆش لە رێوڕەسمێکدا تەرمەکانیان لە کۆبانێ بەخاک سپێردران.