شەش رۆژە هاونیشتمانییەکی کۆمەڵگەی چڕە لە سنووری پارێزگای دهۆک بێسەروشوێنە

 

حەربی جەمیل خالد، کوڕە خوشکی ئەو هاونیشتمانییە ونبووە ( عەبدوڵڵا ئیسماعیل مەحموود ) بە تۆڕی میدیایی رووداوی گوت، لە یەکشەممەی رابردووەوە لە ماڵ چووەتە دەرەوە، گوتیشی، "چووەتە دهۆک بۆ ئەوەی مامەڵەی بەناوکردنی ئۆتۆمبێلەکەی لە بەڕێوەبەرایەتیی هاتووچۆی دهۆک تەواو بکات، لەوکاتەوە بێسەروشێنە."

 

هێمن سلێمان، گوتەبێژی پۆلیسی دهۆک لە بارەی ونبووەکەوە بە رووداوی گوت، کەسوکارەکەی سکاڵایان تۆمار کردووە و لێکۆڵینەوەکانیان بەردەوامن بۆ ئاشکراکردنی شوێنەکەی.

 

حەربی جەمیل خالد، باسی لەوەش کرد، عەبدوڵڵا ئیسماعیل سێ هاوژین و 25 منداڵی هەیە، گوتیشی، "دوو هاوژینی لە کۆمەڵگەی چڕە و هاوژینەکەی دیکەیشی لە پارێزگای سلێمانییە."

 

بەگوتەی ئەو کوڕە خوشکەی ( عەبدوڵڵا ئیسماعیل مەحموود )، ئەوان پۆلیسی دهۆک و سلێمانییان لەو رووداوە ئاگادارکردووەتەوە، باسی لەوەش کرد، "لە کامێرای چاودێرییەوە ئۆتۆمبێلەکەی تاوەکو دووڕییانی شێخان دەردەکەوێت."  

 

حەربی جەمیل ئەوەی روونکردنەوە، "عەبدوڵڵا ئیسماعیل مەحموود، هیچ کێشەیەکی دەروونی، خێزانی و قەرزاریی نەبووە."