لە رووداوێکی هاتووچۆدا لە سنووری دهۆک کەسێک گیانی لەدەستدا و حەوتی دیکە برینداربوون

ئەیوب نووری

رووداو دیجیتاڵ 

کاژێر 05:30 خولەکی ئێوارەی ئەمڕۆ سێشەممە، لەسەر رێگەی بەردەڕەش - کەڵەک لە سنووری پارێزگای دهۆک رووداوێکی ھاتووچۆ روویدا، بەهۆیەوە کەسێک گیانی لەدەستدا و حەوت کەسی دیکەش برینداربوون. 
 
لەوبارەیەوە، موقەدەم ئازاد تەھا، گوتەبێژی پۆلیسی ھاتووچۆی پارێزگای دھۆک بە تۆڕی میدیایی رووداوی راگەیاند، رووداوەکە لە نێوان دوو ئۆتۆمبێل لە جۆری ئۆپڵ ڤیکترا و تۆیۆتا پیکابدا بووە. 
 
بەپێی زانیارییەکان، سێ بریندار لە بەردەڕەش چارەسەریان وەرگرتووە و چواری دیکەشیان رەوانەی نەخۆشخانەکانی ھەولێر کراون. 
 
وەک موقەدەم ئازاد تەھا دەڵێت، ئەو کەسەی گیانی لەدەستداوە ژنێکە بە ناوی "گوڵبەھار ئەمجەد." 
 
بەپێی بەدواداچوونەکانی تۆڕی میدیایی رووداو، لە سەرەتای ئەم مانگەوە تاوەکو رۆژی 16-03 لانیکەم 22 کەس لە هەرێمی کوردستان بە رووداوی هاتووچۆ گیانیان لەدەستداوە و زیاتر 80 کەسی دیکەیش بریندار بوون.
 
ساڵی رابردوو لە هەرێمی کوردستان سێ هەزار و 706 رووداوی هاتووچۆ روویاندابوو؛ دوو هەزار و 909 رووداو بەهۆی پێکدادانی ئۆتۆمبێلەوە بوو، 773 رووداوی وەرگەڕان و 438 رووداوی شێلانیش هەبوون، لە ئەنجامیاندا 445 کەس گیانیان لەدەستدا کە لەو ژمارەیە 78یان ئافرەت بوون، هەروەها حەوت هەزار و 250 کەسیش برینداربوون.