دهۆک؛ پیاوێک لەکاتی گەڕانەوەی لە نوێژ گولـلەی وێڵ بەر سەری دەکەوێت

 

 

بەپێی زانیارییەکانی پەیامنێری رووداو، رووداوەکە لە گەڕەکی شێلێ لە دهۆک کاژێر 07:00ی ئێوارەی رۆژی یەکشەممە 20ی ئادار روویداوە و هاووڵاتییەک بەناوی سدیق پاسی کە تەمەنی 65 ساڵ بووە، گولـلە بەر سەری کەوتووە و بە سەختی بریندار بووە.

 

عەزیز سدیق، کوڕی سدیق پاسی بە تۆڕی میدیایی رووداوی راگەیاند، باوکی لەگەڵ دوو هاوڕێی کاتێک لە نوێژی مەغریب گەڕاوەتەوە، گولـلە بەر سەری کەوتووە و دەستبەجێ کەوتووە و ئاگای لەخۆی نەماوە.

 

دوای گەیاندنی بە نەخۆشخانەی فریاکەوتن پشکنینی پێویست بۆ سدیق کراوە و پزیشکان بنەماڵەکەییان ئاگادارکردووەتەوە کە دۆخی تەندروستیی باش نییە.

 

کوڕەکەی سدیق پاسی دەڵێت، تاوەکو 24 کاژێری دیکە چاوەڕوان دەکەن تاوەکو بزانن رەوشی تەندروستیی چی بەسەردێت، "تووشی خوێنبەربوون دەبێت یاخود نا".

 

عەزیز سدیق داوای کرد کە دیاردەی تەقەکردن لەکاتی خۆشی و نەورۆزدا نەمێنێت، بۆئەوەی خۆشی لە هیچ ماڵێک نەبێتە ناخۆشی.