لە زۆربەی ناوچەکانی پارێزگای ورمێ باران دەبارێت

 

 

شەپۆلی بارانبارین پارێزگای ورمێ و چەند پارێزگایەکی ئێران، بەتایبەت پارێزگاکانی باکووری ئەو وڵاتەی گرتووەتەوە. لە پارێزگای ورمێ بارانی زیاتر لە شارەکانی ورمێ، ماکۆ، سەڵماس، مهاباد، شنۆ و پیرانشار باریوە. لەنێو شاری ورمێ، بەهۆی بارانبارین ئاو لەنێو شەقام و گەڕەکەکان کۆبووەتەوە و ئاستەنگی بۆ هاتووچۆ دروستکردووە.

 

لە رێگەکانی پارێزگای ورمێ، بەتایبەت رێگەی قوشچی ورمێ و بورهانی نێوان مهاباد و بۆکان، چەند رووداوێکی هاتووچۆ روویانداوە و شایەتحاڵان دەڵێن، بەهۆی خلیسکبوونی رێگەکان، ئەو رووداوانە روویانداوە.

 

کەشناسیی ئێران ئەمڕۆ هەینی رایگەیاند، بارانبارین لە ورمێ، تەورێز، ئەردەبیل، گیلان، مازەندەران، قەزوێن، تاران، کەرەج، سمنان و خۆراسان ئەمڕۆش بەردەوام دەبێت، هەورەبرووسکە و رەشەبایشی لەگەڵدا دەبێت؛ هەروەها رایگەیاندووە، لە ورمێ و تەورێز و ئەردەبیل سبەی شەممەش بارانبارین بەردەوام دەبێت.