لە سنە 70 بەندکراو ئازاد کران
رووداو دیجیتاڵ
لە زیندانەکانی سنووری پارێزگای سنە 70 زیندانی ئازاد کران؛ بەڕێوەبەری گشتیی کاروباری زیندانەکانی پارێزگاکە دەڵێت، لەلایەن خێرخوازانەوە 20 ملیار تمەن بۆ ئازادیی ئەو بەندکراوانە کۆکراوەتەوە.
ئەمڕۆ پێنجشەممە، 19-09-2024، محەممەد خوسرەوی، بەڕێوەبەری گشتیی کاروباری زیندانەکانی پارێزگای سنەی رۆژهەڵاتی کوردستان ئازادبوونی 70 بەندکراوی لە زیندانەکانی سنووری پارێزگاکە رایگەیاند و گوتی، ''تاوان''ـی ئەو بەندکراوانە بەئەنقەست نەبووە و لەلایەن خێرخوازانەوە 20 ملیار تمەن (نزیکەی 330 هەزار دۆلار) بۆ ئازادکردنیان کۆکراوەتەوە.
محەممەد خوسرەوی گوتی، لە سەرەتای نەورۆزەوە، 135 بەندکراو لە زیندانەکانی پارێزگاکە ئازاد کراون کە بەگشتی لەلایەن خێرخوازانەوە 92 ملیار تمەنیان (نزیکەی یەک ملیۆن و 530 هەزار دۆلار) بۆ ئازادکردنیان کۆکراوەتەوە.
بەڕێوەبەری گشتیی کاروباری زیندانەکانی سنە ئەوەشی خستەڕوو، ''ئێستا 250 بەندکراو کە تاوانی بەئەنقەستیان ئەنجام نەداوە، چاوەڕێی هاوکاریی خێرخوازانن کە بۆ ئازادکردنیان 100 ملیار تمەن ( نزیکەی یەک ملیۆن و 600 هەزار دۆلار) پێویستە.''
ئەو شێوە ئازادکردنە، زیندانیانی سیاسی ناگرێتەوە و تەنیا ئەو کەسانە دەتوانن لێی سوودمەند بن، کە بەهۆی ''تاوانەکان''ـیانەوە سکاڵایان لەسەر تۆمار کراوە و پێبژاردن، خوێنبایی، قەرزی حکومی یان ناحکومییان لەسەرە.