دڵشاد شەهاب: سەرۆکی هەرێمی کوردستان لەسەر هێڵە بۆ ئاشکراکردنی ئەنجامدەرانی تاوانەکەی مێردین

 

رۆژی هەینی، 20-1-2023، دڵشاد شەهاب، راوێژکاری باڵای سەرۆکی هەرێمی کوردستان بە تۆڕی میدیایی رووداوی گوت، نێچیرڤان بارزانی، سەرۆکی هەرێمی کوردستان لە رێگەی تەلەفۆنەوە لەگەڵ کەسوکاری قوربانییەکان قسەی کردووە و سەرەخۆشی لێکردوون، ئەوانیش لە خاوەنداریکردنی سەرۆکی هەرێمی کوردستان لە دۆسێیەکەیان دڵخۆش بوون.

 

دڵشاد شەهاب گوتی: "لە سەرەتای رووداوەکەوە سەرۆکی هەرێمی کوردستان لەگەڵ دەوڵەتی تورکیادا لەسەر هێڵ بووە بۆ ئاشکراکردنی هۆکاری رووداوەکە و ئەنجامدەرانی. هەموو چین و توێژەکان بەشدارییان لە پرسەکەدا کردووە، چونکە ئەمە پرسەی هەموو هەرێمی کوردستان و سەرۆکی هەرێمی کوردستانیشە".

 

راوێژکارە باڵاکەی سەرۆکی هەرێمی کوردستان ئاماژەی بەوەش کرد، "بە دڵنیاییەوە" سەرۆکی هەرێمی کوردستان بەردەوام و بە جیدیی چاودێریی دۆسێیەکە دەکات بۆ ئاشكراکردنی تاوانباران بۆ ئەوەی لێپرسینەوەی یاساییان لەگەڵ بکرێت.

 

دڵشاد شەهاب گوتیشی، رووداوەکە کاریگەریی نەرێنی لەسەر دەروونیی خەڵك دەبێت و بۆ هەرێمی کوردستان چەندە گرنگ بێت بۆ تورکیاش هێندە گرنگە، چونکە بەردەوام هاتووچۆ لەنێوان هەرێمی کوردستان و تورکیادا هەیە و خەڵک دەیەوێت لە رێگەی هاتووچۆکەی دڵنیا بێت.

 

لە بەشێکی دیکەی قسەکانیدا، دڵشاد شەهاب جەختی لەوە کردەوە کە سەرۆکایەتیی هەرێمی کوردستان و دامەزراوەکانی حکومەت و پەیوەندییە فەرمییەکانی هەرێمی کوردتسان لەگەڵ تورکیادا لەسەر هێڵ دەبن. گوتیشی: "نابێت پێش رووداوەکان بکەوین. بەدڵنیاییەوە دەوڵەتی تورکیاش بڕیاریداوە لێپرسینەوەی جیدی بکات. رەنگە سەرەداوی سەرەتاییش دەستکەوتبن، بەڵام هێشتا زووە و ئێمە دەبێت چاوەڕوانی لێکۆڵێنەوەکان بکەین".

 

بەرەبەیانی رۆژی پێنجشەممە، 19-01-2023، لە شارۆچکەی نسێبینی سەر بە پارێزگای مێردینی باکووری کوردستان، پێنج هاونیشتمانیی خەڵکی دهۆک لە ئۆتۆمبێلێکدا کوژران. بەرەبەیانی رۆژی هەینی تەرمەکانیان گەڕێندرایەوە بۆ هەرێمی کوردستان و دوای بەخاکسپارن، لە شاری دهۆک پرسەیان بۆ دانرا.

 

 

حاجی عەبدوڵڵا ساڵح مستەفا: 69 ساڵ

چیمەن شاهین خالید: 75 ساڵ، هاوژینی حاجی عەبدوڵڵایە

هندرێن عەبدوڵڵا ساڵح: 39 ساڵ، کچی حاجی عەبدوڵڵایە

واحیدە حەیدەر جاسم: 63 ساڵ

مەلا ئەحمەد جەلالەدین ئیبراهیم: 45 ساڵ

 

بەگوێرەی زانیارییەکان، شەش کەس لەسەر رووداوەکە دەستگیرکراون و دانیان بەوەدا ناوە کە بۆ پارە ئەو کارەیان کردووە.