وەزارەتی گواستنەوە بۆ رووداو: کێشەی تەکنیکی جیهان هیچ کاریگەریی لەسەر هەرێمی کوردستان نەبووە
رووداو دیجیتاڵ
گوتەبێژی وەزارەتی گواستنەوە و گەیاندنی هەرێمی کوردستان دەڵێت، ئەو کێشە تەکنیکییەی وڵاتانی گرتووەتەوە هیچ کاریگەریی لەسەر هەرێمی کوردستان نەبووە. دەشڵێت، ئاگادار نەکراونەتەوە کە کێشە بۆ سیستمی راگەیاندنی ئەنجامی تاقیکردنەوەی قوتابیان دروستبووبێت.
ئەمڕۆ بەهۆی داڕمانی سیستمی تەکنیکی جیهانەوە کێشە بۆ بەشێک لە فڕۆکەخانە، بانک و ناوەندە ئەلیکترۆنییەکانی جیهان دروستبوو.
دیلان رەشاد، گوتەبێژی وەزارەتی گواستنەوە و گەیاندنی هەرێمی کوردستان ئەمڕۆ هەینی بە تۆڕی میدیایی رووداوی گوت: "ئەو کێشە تەکنیکییەی بەشێکی وڵاتانی گرتووەتەوە هیچ کاریگەرییەکی لەسەر هەرێمی کوردستان دروست نەکردووە".
گوتەبێژی وەزارەتی گواستنەوە ئاماژەی بەوەشکرد، فڕۆکەخانەکانی هەرێمی کورستان، بانکەکان و هێڵەکانی ئینتەرنێت لە هەرێمی کوردستان وەکو خۆیان کار دەکەن و هیج گرفتێکیان نەهاتووەتە پێش.
بڕیارە ئێوارەی ئەمڕۆ ئەنجامی تاقیکردنەوەکانی پۆلی 12ـی ئامادەیی هەرێمی کوردستان بڵاوبکرێتەوە، لەبارەی کاریگەریی کێشەکان لەسەر بڵاوبوونەوەی ئەنجامەکان، دیلان رەشاد گوتی: "هیچ کێشەیەک بەهۆی گرفتی تەکنیکییەوە کوردستانی نەگرتووەتەوە و هیچ ئامێرێکی ئەلیکترۆنیش لەکار نەوەستاوە. لەبارەی ئەنجامەکانیشەوە هیچ لایەنێک ئێمەی لە بوونی کێشە ئاگادار نەکردووەتەوە کاری لەسەر بکەین".
هەر ئەمڕۆ بەرپرسانی فڕۆکەخانەکانی هەولێر، سلێمانی و کەرکووک بە رووداویان گوت، کێشەیان نییە و گەشتەکانیان بە گوێرەی پلان بەڕێوەدەچێت.
هاوکات، تیمی هەژماری من لە حکومەتی هەرێمی کوردستان بە رووداوی گوت، کێشەیان نییە و هەرکەس پارە لە هەژمارەکەیدا هەبێت دەتوانێت بچێت رایبکێشت.
کێشە تەکنیکییەکە زیاتر وڵاتانی ئەمریکا، ئوسترالیا و بەشێک لە وڵاتانی ئەورووپای گرتووەتەوە و زۆربەی گەشتەکانی فڕۆکەخانە و شەمەندەفەر و کەشتی وەستاون.
هەروەها سیستمی پەیوەندیکردن بە گشتی لەو شوێنانەی کە ئامێرەکانی مایکرۆسۆفت بەکاردەهێنن کێشەیان تێکەوتووە.