سەرۆک بارزانی و شاندێکی باڵای سەربازی و ئەمنیی عێراق کۆبوونەوە
رووداو دیجیتاڵ
سەرۆک مەسعود بارزانی پێشوازیی لە شاندێكی باڵای سەربازی و ئەمنیی عێراق کرد و جەختیان لە هەماهەنگیی نێوان هێزی پێشمەرگەی کوردستان و هێزەکانی سوپای عێراق کردووەتەوە.
رۆژی یەكشەممە 19ی حوزەیرانی 2022 لە سەلاحەدین سەرۆك مەسعود بارزانی پێشوازیی لە شاندێكی باڵای سەربازی و ئەمنیی عێراق بە سەرۆكایەتیی جەنەراڵ عەبدولئەمیر رەشید یارەڵڵا، سەرۆكی ئەركانی سوپای عێراق كرد، كە پێكهاتبوو لە فەرماندەكانی هێزی زەوینی، ئاسمانی، پاسەوانی سنوور، پۆلیسی فیدراڵ، هەواڵگری، هەواڵگریی سەربازی و ئۆپەراسیۆنە هاوبەشەكان.
لە دیدارەكەدا دوایین گۆڕانكارییە مەیدانییەكانی شەڕی دژی تیرۆریستان و پاراستنی ئاسایش و سەقامگیریی ناوچە جێناكۆكەكان و هەماهەنگی لەگەڵ هێزی هاوپەیمانان تاوتوێ كرا.
هەر لەو كۆبوونەوەیەدا جەخت لە هاوكاری و هەماهەنگیی نێوان هێزی پێشمەرگە و هێزەكانی سوپای عێراق كرایەوە.