نرخی تەماتەی خۆماڵی دابەزی؛ عێراق دەروازەکانی بۆ هاوردەکردنی کردەوە

 

 

سەروەر عەلی، بەرپرسی سەندیکای عەلوەی سلێمانی ئەمڕۆ هەینی بە تۆڕی میدیایی رووداوی گوت: "پێش هاوردەکردنی تەماتە لە ئێرانەوە بۆ نێوەڕاست و خوارووی عێراق، کیلۆیەک تەماتەی هەرێمی کوردستان لە عەلوە 900 دینار بوو، ئێستا دابەزیوە بۆ 600 دینار".

 

سەروەر عەلی دەڵێت: "کردنەوەی دەروازەکان بۆ هاوردەکردنی تەماتە بۆ عێراق زیانی زۆر بە جووتیارانی هەرێمی کوردستان و بەرهەمی نێوخۆ دەگەیێنێت".

 

لە هەرێمی کوردستان قەدەخەی هاوردەکردنی تەماتە بەردەوامە و بڕیارە 1ـی مانگی 11 قەدەخەی لەسەر هەڵبگیرێت.

 

لە وەرزی پێگەیشتنیدا، تەماتەی هەرێمی کوردستان جیا لە پڕکردنەوەی بازاڕی نێوخۆ، بەشێکیشی هەناردەی نێوەڕاست و خوارووی عێراق دەکرێت.