لە زاخۆ قوتابخانەیەکی 100 ساڵی تێکدەدرێت؛ بڕیارەکە ناڕەزایی لێکەوتووەتەوە

 

ئەو نووسەر و رۆشنبیرەی زاخۆ دەڵێ، پێشنیازی کردبوو بەشێکی ئەو قوتابخانەیە بکرێتە مۆزەخانە.

 

سەعید سدیق، نووسەر و رۆشنبیری زاخۆ دەڵێ "ئێستاش لەسەر هەمان بیروباوەڕی خۆمم؛ ئەگەر ئەو بەشەی قوتابخانەیە مابووایە و لایەکەی دیکەی کرابووایە باخچە، زۆر جوان دەبوو ئەگەر کرابووایە مۆزەخانەیەک بۆ پەروەردە. پێویستە هەموومان دەنگمان هەڵبڕین و ئەو قوتابخانە کە لە ساڵی 1922 دروستکراوە، بپارێزین."

 

پەیکەری قوتابییەک کە جانتایەکی بەدەستەوە، لە قوتابخانەکەدا هەیە، لە ساڵی 1978 بەهۆی زیرەکیی قوتابییەک بەناوی مامەند، پەیکەرەکەی بۆ دروستکراوە، بەڵام مامەند رازییە قوتابخانەکە بڕووخێنرێت و، دەڵێ ئەگەر لەبەر بەرژەوەندیی گشتییە، ئەو یادەوەرییەش نەمێنێت، ئاساییە.

 

مامەند هۆشیار، خەڵکی زاخۆیە، دەڵێ "رێزم بۆ بۆچوونی هەموولایەک هەیە، بەڵام من لەگەڵ ئەوەدام رێژەی سەوزایی لە شارەکەماندا زۆر بێت و پارک و شوێنی سەوزایی زیاد بن."

 

دەگوترێت چیرۆکی دروستکردنی قوتابخانەکە بۆ ساڵی 1922 دەگەڕێتەوە، قوتابخانەکە چەندین جار نۆژەنکراوەتەوە و گواستراوەتەوە، لەسەر ئەو بابەتەش چەند بۆچوونێکی جیاواز هەن.

 

پەروەردەی زاخۆ لەسەر بڕیاری تێکدانی قوتابخانەکە رازیبووە و روونی دەکاتەوە لە جێگەی ئەو قوتابخانەیە، ئیدارەی سەربەخۆی زاخۆ چوار قوتابخانەی دیکەی کردووەتەوە.

 

ئیبراهیم ئەنوەر، بەڕێوەبەری پەروەردەی زاخۆ گوتی "سێ، چوار قوتابخانە لە دەوروبەری ئەو قوتابخانەیە هەن، ژمارەی قوتابییەکانی قوتابخانەکەش 200 و هەندێک بوو، رەنگە سێ چارەگیان لە دەرەوەی سنوورەکەشەوە هاتبن، ئێمە جێگەمان بۆ دۆزیونەتەوە، مادام رووخاندنی قوتابخانەکە بۆ بەرژەوەندیی گشتییە، ئێمەش رازی بووین."

 

لە شوێنی قوتابخانەکە، بڕیارە لە قاتی یەکەم گەراجێکی وەستانی ئۆتۆمبێل و لە قاتی سەرەوەشدا پارکێک دروستبکرێن بۆ تەواوکردنی پارکی شەهیدان لەنێو بازاڕی زاخۆ.