ئەندامێکی کۆماندۆ لە رانیە کوژرا
رووداو دیجیتاڵ
کەسێک بە گولـلە لە رانیەی ناوەندی ئیدارەی سەربەخۆی راپەڕین لە پارێزگای سلێمانی کوژرا. ئەو کەسە ئەندامی هێزەکانی کۆماندۆی کوردستان بوو. خزمێکی کوژراوەکە دەڵێت، "بە هەڵە کوژراوە."
پۆلیسی ئیدارەی سەربەخۆی راپەڕین لەبارەی رووداوەکەوە ئەمڕۆ شەممە بە رووداوی گوت، "شەوی رابردوو لە رووداوێکدا ئەندامێکی هێزەکانی کۆماندۆ گیانی لەدەستدا."
ئەو کەسە ناوی زێدان عەزیز سوورچی و خەڵکی قەزای ئاکرێیە. خزمێکی بە رووداوی گوت، "لە دەوام بوو و گولـلە لەدەستی هاوڕێیەکی دەرچووە و زێدانی کوشتووە."
زێدان عەزیز باوکی دوو منداڵە و حەوت مانگە وەک ئەندامی کۆماندۆ دەستبەکار بووە. بە گوتەی کەسوکارەکەی بۆ رووداو، تاوەکو ئێستا هیچ مووچەیەکی وەرنەگرتووە و بڕیار بووە ئەم مانگە بۆ یەکەم جار مووچە وەربگرێت.
بەگوێرەی زانیارییەکانی رووداو، دوای رووداوەکە تۆمەتبارەکە دەستگیر کراوە.