ئاوی دەوروبەری هەولێر: 50 بیر لە سنوورەکە وشک بوون

 

 

رێزان سەعدی، بەڕێوەبەری ئاوی دەوروبەری هەولێر لە کاتی بەشداریکردنی لەبەرنامەی مژاری رادیۆی رووداو رایگەیاند، بەهۆی دابەزین و کەمبوونەوەی ئاستی ئاوی ژێر زەویی لە دەرووبەری هەولێر زیاتر لە 50 بیر وشک بوون.

 

رێزان سەعدی ئاماژەی بەوەدا بۆ چارەسەرکردنی گرفتی کەمئاوی و دابینکردنی ئاوی خواردنەوە بۆ ئەو شوێنانەی گرفتیان بۆ دروست بووە، توانیویانە 35 بیری نوێ لە جێگەی ئەو بیرانەی کە وشکیان کردووە هەڵی بکەنن و لە هەوڵیشدان ژمارەیەک بیری دیکە لە شوێنی بیرە وشکبووەکان هەڵبکەنن.

 

بەڕێوەبەری ئاوی دەوروبەری هەولێر ئاماژەی بەوەشکرد، ئێستا هەموو ئەو بیرانەی کە قوڵییان لە نێوان 200 بۆ 300 مەترە، مەترسی وشکبوونیان لەسەرە و هەر بیرێکی نوێ هەڵبکەنن قوڵییەکەی زیاتر دەکەن بەشێوەیەک قوڵترین بیریان نزیکەی 700 مەترە.

 

بەگوتەی رێزان سەعدی، لە هەموو قەزا و ناحییەکانی دەورووبەری هەولێر گرفتی دابەزینی ئاوی ژێر زەوی هەیە، هۆکارەکەش ئەوەیە تائێستا زۆرترین رێژەی پشتبەستن بە ئاوی ژێر زەوی بووە تەنانەت بۆ کشتوکاڵ و ئاودێریش.

 

بەڕێوەبەری ئاوی دەوروبەری هەولێر ئاماژە بەوە دەکات داوایان کردووە چاندنی گەنمەشامی و حەوزی بەخێوکردنی ماسی بە ئاوی بیر قەدەخە بکرێت، چونکە ئاوی زۆریان پێویستە.

 

پرۆژەی ئاوی گوندی زەرگەزەوی لە ناحیەی دارەشەکران ماوەی چەند ساڵێکە تەواو نەکراوە و بەشێک لە گوندەکانی دەوروبەری هەولێر لە سنووری ناحیەی دارەشەکران دەڵێن، گرفتی ئاویان هەیە و داوای تەواوکردنی پرۆژەکە دەکەن.

 

رێزان سەعدی دەڵێت: "پرۆژەکە بەهۆی قەیرانی داراییەوە راگیرابوو، ئێستا نزیکەی ٦٥٪ی کارەکانی تەواوبووە و بودجەی پرۆژەکە ٣ ملیار دینارە، پرۆژەکە دەستیپێکردووەتەوە و لە زووترین کاتدا تەواو دەبێت."

 

رێزان سەعدی گوتیشی، بەگوێرەی پلانمان، داوامان کردووە پرۆژەی ئاوی خەبات، کە لە رووباری زێی گەورەوە ئاو بۆ سنووری خەبات و دەورووبەری دابین دەکرێت و هەروەها پرۆژەی ئاوی قوشتەپە لە گوندی قەشقە، ئاو بۆ قوشتەپە و نزیکەی  60 گوند سوود لەو پرۆژەیە دەبینن، پێشنیازمان بۆ حکومەت کردووە بۆ جێبەجێکردنی، بودجەی بۆ تەرخانبکرێت.