حاجییەکی دیکەی هەرێمی کوردستان لە سعودیە کۆچی دواییکرد

 

 

ئەمڕۆ دووشەممە، 17-06-2024، ئارام شێخ جەمال، بەڕێوەبەری گشتیی ئەوقافی هەڵەبجە و سەرپەرشتیاری حاجییانی سنووری پارێزگاکانی سلێمانی و هەڵەبجە و ئیدارەکانی گەرمیان و راپەڕین بۆ حەجی ئەم ساڵ بە تۆڕی میدیایی رووداوی گوت: "حاجییەکە دوێنێ لەکاتی ئەرکەکانی حەجدا گیانی لەدەستدا".

 

ئەو هاونیشتمانییەی گیانی لەدەستداوە ناوی عەبدولحەمید رەحیم عەبدولکەریمە و لەدایکبووی 08-09-1957ـە. ئارام شێخ جەمال دەڵێت: "دوێنێ لە کاتی گەڕانەوە لە عەرەفە و لەکاتی نوێژی جەماعەتدا دۆخی تەندروستی تێکچوو و گەیێندرایە نەخۆشخانە، بەڵام دواتر گیانی لەدەستدا".

 

گیانلەدەستدانی ئەو هاونیشتمانییە دەبێتە حەوتەم کەس کە ئەم ساڵ لەکاتی بەجێهێنانی فەریزەی حەجدا گیانیان لەدەستداوە. 

 

بەگوێرەی دەستەی حەج و عومرەی هەرێمی کوردستان بۆ رووداو، ناسنامەی شەش حاجییەکەی دیکە کە گیانیان لەدەستداوە بەمشێوەیەیە:

 

- زینەت رەشید قادر 

- رازیە عەلی

- ئاسیا عەلی

- حەمە حەسەن عەبدوڵڵا

- هەمین قادر

- ئەحمەد باڵەکی

 

ئەم ساڵ 4685 هاونیشتمانی بۆ حەجکردن چوونەتە سعودیە؛ لەو ژمارەیە 1460 کەسیان بە رێگەی وشکانی رۆشتوون.

 

کاروان ستوونی، گوتەبێژی بەڕێوەبەرایەتیی حەج و عومرەی هەرێمی کوردستان بە تۆڕی میدیایی رووداوی گوت، لە 20ـی ئەم مانگەوە دەست بە گەڕاندنەوەی ئەو حاجییانە دەکرێت کە لە رێگەی وشکانییەوە رۆیشتوون.

 

لە حەجی ساڵی 2023ـدا چوار هەزار و 685 هاونیشتمانی بۆ بەجێگەیاندنی فەریزەی حەج چوونە مەککە کە 720ـیان بە رێگەی وشکانی و ئەوانی دیکە بە رێگەی ئاسمانی چوون.