ئەنەکەسە: گرووپێکی سەر بە پەیەدە هێرشیانکردووەتە سەر نووسینگەی پەدەکەسە

 

ئەنجوومەنی نیشتمانی کورد لە سووریا - ئەنەکەسە لە راگەیێندراوێکدا دەڵێت، "رۆژی 16ـی نیسانی2021، گرووپێکی چەکدار کە سەر بە پارتی یەکێتی دیموکرات -پەیەدە بوون، هێرشیانکردووەتە سەر نووسینگەی قامشلۆی پارتی دیموکراتی کوردستان لە سووریا - پەدەکەسە کە ئەندامە لە ئەنجوومەنی نیشتمانی کورد لە سووریا - ئەنەکەسە."

 

بە گوێرەی راگەیێندراوی ئەمینداری گشتیی ئەنەکەسە، گرووپە چەکدارەکە لەکاتی هێرشەکەدا قسەی ناشرین و جنێویان بە ئەندامانی پەدەکەسە گوتووە و مۆبایلەکانیشیان لێسەندوون و دوای ماوەیەک بۆیان گەڕاندوونەتەوە.

 

ئەنەکەسە لە راگەیێندراوەکەیدا لەبارەی ئەو هێرشەوە ئاماژە بەوەش دەکات، ئەو کارە شەرمەزار دەکەین و ئەمە بە سووکایەتیکردنی بە بەڵێنەکانی فەرماندەی گشتیی هێزەکانی سووریای دیموکرات - هەسەدە لە قەڵەم دەدەین و داوای لە هەسەدەش کرد "رێگە لەو پێشێلکارییانە بگرێت کە گفتوگۆی  کوردی - کوردی دەکەنە ئامانج."

 

پارتی یەکێتیی دیموکرات - پەیەدە تاوەکو ئێستا هیچ راگەیێندراوێکی لەوبارەیەوە بڵاونەکردووەتەوە.