پەرلەمانی کوردستان "سیفەتی بەپەلەی" بە پرۆژەیاسای چاکسازی دا

 

 

هادی سەلیمی، پەیامنێری رووداو لە هەولێر رایگەیاند، لە دانیشتنی ئەمڕۆی پەرلەمانی کوردستاندا کە بڕگەی یەکەمی تایبەتبوو بە خوێندنەوەی یەکەم بۆ پرۆژەیاسای چاکسازی، خوێندنەوەی یەکەم بۆ پرۆژەیاساکە کرا و و پاشان بە دەنگی زۆرینەی پەرلەمانتاران "سیفەتی بەپەلە" بە پرۆژەیاساکە درا، بەڵام چەند ئەندامێکی فراکسیۆنی یەکێتی لە پەرلەمان دەنگیان بەوە نەدا و پێیانوایە دەبێت پەلە نەکرێت لە پەسندکردنی ئەو پرۆژەیاسایە.

 

لوقمان وەردی، پەرلەمانتاری فراکسیۆنی یەکێتی لە پەرلەمانی کوردستان لەبارەی هۆکاری ئەوەی بەشێک لە ئەندامانی فراکسیۆنی یەکێتی دەنگیان بەو پێشنیازە نەداوە بە رووداوی راگەیاند "ئێمە پێمانوایە ئەمە کاتی زۆرتری دەوێت، دەشتوانین وەرزی یاسادانانی پەرلەمان درێژبکەینەوە بۆ دوو هەفتەی دیکە بۆئەوەی بتوانین گفتوگۆ لەسەر پرۆژەیاسای چاکسازی بکەین".

 

لوقمان وەردی ئەوەشی گوت "ئەمەش لە جەوهەری پرۆژەکە و پشتیوانیکردنمان بۆ پرۆژەکە ناگۆڕێت، بەڵام بە جۆرێک لە موزایەدە تێگەیشتین بۆئەوەی سیفەتی بەپەلەی پێبدرێت".

 

پەیامنێری رووداو ئاماژەی بەوە کرد، لە بڕگەی دووەمی دانیشتنەکەی ئەمڕۆی پەرلەمانی کوردستان پرۆژەیاسای رێکلامی بازرگانی پەسندکرا، ئێستا خوێندنەوەی دووەم بۆ پرۆژەیاسای ماددە هۆشبەرەکان و کارتێکەرە ئەقڵییەکان دەکرێت.