لە سەیدسادق کچێک تەقە لە دادگە دەکات و دەستگیردەکرێت

 

 

رۆژی هەینی 16ـی ئەیلوولی 2022، دیاری رەفیق، قایمقامی قەزای سەیدسادق بە تۆڕی میدیایی رووداوی راگەیاند: "دەوروبەری کاژێر 6ـی بەیانی ئەمڕۆ کچێکی تەمەن 20 ساڵان بە چەکی کڵاشینکۆف تەقەی لە باڵەخانەی دادگەی سەیدسادق کرد و دواتر بەنێو کۆڵانەکاندا تەقەی کرد، بەڵام هیچ کەسێک بەهۆی گوللـەکانەوە بریندارنەبوو."

 

دیاری رەفیق گوتی، کچەکە خوشکی ئەو تۆمەتبارەیە رۆژی 4ـی ئەیلوول تەقەی لە هێزەکانی پۆلیس و ئاسایش کرد و دواتر دەستگیرکرا. قایمقامی قەزای سەیدسادق رەتیکردەوە ئەو کچە نارنجۆکی هەڵدابێتە نێو باڵەخانەی دادگەوە و گوتی:"کچەکە بۆ تەقەکردن لە ئاسایش و هێرشکردنە سەر بینای ئاسایش رۆیشتووە، بەڵام لێی تێکچووە و تەقەی لە دادگە کرد، چونکە باڵەخانەکان لە نزیکی یەکدین؛ کچەکە بەتەنیا بووە و ئێستا لەلایەن هێزەکانی ئاسایشەوە دەستبەسەرە و لێکۆڵینەوە لەگەڵ دەکرێت."

 

رۆژی یەکشەممە 4ـی ئەیلوولی 2022، یاسین عەبدولسەمیع، گوتەبێژی ئاسایشی سلێمانی لە کۆنگرەیەکی رۆژنامەڤانیدا رایگەیاند: "لە قەرەداخ هێزەکانی ئاسایش کاتێک هەوڵیاندا ماتۆڕسکیلێک کە دەموچاوی هەڵپێچرابوو، رابگرن بۆئەوەی لێکۆڵینەوەی لەگەڵ بکەن، کەسەکە رووبەڕووی هێزەکانی ئاسایش بووەوە و دواتر هەڵات و لە یەکێک لە گەڕەکەکانی قەرەداخ لە ماڵێکدا هەوڵی خۆشاردنەوەی دا."

 

گوتەبێژی ئاسایشی سلێمانی گوتی: "هێزەکانی ئاسایش و پۆلیس هەوڵێکی زۆریان دا کەسەکە خۆی رادەستبکات، بەڵام ئەو کەسە بە مەبەستی کوشتن چووبووە ناوچەکە و بە نارنجۆک پەلاماری هێزەکانی ئاسایش و پۆلیسی دایەوە و دواتر بە دەمانچە تەقەی کرد و بەهۆیەوە سێ کارمەندی هێزەکانی ئاسایش و چوار کارمەندی هێزەکانی پۆلیس و هاووڵاتییەک بریندار بوون."

 

یاسین عەبدولسەمیع گوتیشی: "دوای هەوڵدانێکی زۆری هێزەکانی ئاسایش و پۆلیس بۆئەوەی بە زیندوویی بگیرێت، تیرۆریستەکە خۆی بەدەستەوە نەدا و لەلایەن هێزەکانەوە کوژرا."