پۆلیسی راپەڕین تەرمی منداڵێکی هەشت ساڵان بە کوژراوی لە چیایەک دەدۆزێتەوە

 

پۆلیس دەڵێت، تەرمی منداڵەکە لە چیای هەنجیرە دۆزراوەتەوە و لەنزیکی "موشار"ـێک دۆزراوەتەوە، تۆمەتبارەکەش دەستگیرکراوە.

 

بەگوێرەی راگەیێندراوێکی بەڕێوەبەرایەتی پۆلیسی ئیدارەی راپەڕین، دوێنێ 15ـی تەمموز، هاووڵاتییەکی "سووری" سەردانی بەشی پۆلیسی نەهێشتنی تاوانی کردووە و سکاڵای دژی کەسێکی نەناسراو تۆمارکردووە و گوتوویەتی: بەفێڵی شتکڕین، کوڕە هەشت ساڵانەکەی لەماڵ بردووەتە دەرەوە و دواتر نەگەڕاوەتەوە.

 

پۆلیس ئاماژەی بەوە کردووە، دوای بەدواداچوون "توانرا ناسنامەی تۆمەتبارەکە ئاشکرا بکرێت و تۆمەتبارەکە دۆزرایەوە و دەستگیرکرا؛ کە تەمەنی 21 ساڵە و دانیشتووی رانیەیە". 

 

پۆلیسی راپەڕین دەڵێ "بەگوێرەی زانیارییەکان، تۆمەتبارەکە لە رووی دەروونییەوە ناجێگیرە و دوای لێکۆڵینەوە، دانیناوە بەتاوانەکەیدا و گوتوویەتی بە فێڵی شت کڕین منداڵە هەشت ساڵانەکەی بردووە بۆ شاخ لە نزیک شاخی هەنجیرە و بە چەقۆ کوشتوویەتی".

 

پۆلیس ئاماژەی بەوە کردووە، دوای پێکهێنانی لیژنەیەک، بەرەبەیانی ئەمڕۆ (یەکشەممە، 16-7-2023) تەرمی منداڵەکەیان لە شاخ دۆزیوەتەوە و لەنزیک تەرمەکەشییەوە، "موشارێک"ـیان دۆزیوەتەوە.

 

تەرمی منداڵەکە رەوانەی دادپزیشکی کراوە و تۆمەتبارەکەش بەگوێرەی مادەی 406 راگیراوە.