بەهۆی وشکەساڵییەوە، رووداوی ئاگرکەوتنەوە لە دارستانەکانی رۆژهەڵاتی کوردستان زیادیان کردووە
رووداو دیجیتاڵ
ساڵانە 46٪ـی ئاگرکەوتنەوەکانی ئێران لە دارستانەکانی زاگرۆس روودەدەن. رێکخراوی پاراستنی ژینگەی ئێران دەڵێت؛ ئاگرکەوتنەوەکان بوونە هۆی مەترسی لەسەر مرۆڤ و 292 جۆر زیندەوەری دیکەی ناوچەی زاگرۆس. هۆکاری ئاگرکەوتنەوەکانیش بە تایبەت لەم ساڵانەی دواییدا بۆ وشکەساڵی و گەرمی پلەکانی گەرما دەگەڕێنەوە، بەڵام بەشێکیش لەو رووداوانە بەهۆی ئەو کەسانە روودەدەن کە ئەو دارانە دەسووتێنن بۆ دروستکردنی خەڵووز.
ژینگەپارێزانی ناوچەکە دەڵێن، کەلوپەلی پێویست بۆ کۆنترۆڵی ئاگرکەوتنەوەکان کەمە و داوا لە خەڵک دەکەن لە رۆژانی گەرمادا ئاگاداری دارستانەکان بن. دارستانەکانی زاگرۆس 40٪ـی دارستانەکانی ئێران پێکدێنن و دەکەونە شەش پارێزگای ئێران و پێنج پارێزگای رۆژهەڵاتی کوردستانەوە.
ئەمساڵ لە هەموو بەشەکانی ئەو دارستانانە لە رۆژهەڵاتی کوردستان، ئاگرکەوتنەوە روویداوە و بەهۆی نەبوونی کەلوپەلی تایبەت بە ئاگر کوژێنەوە، کۆنترۆڵی ئەو رووداوانە تەنیا لە ئەستۆی ژینگەپارێزان بووە.
بەگوتەی بەرپرسانی پاراستنی ژینگەی رۆژهەڵاتی کوردستان بەشێک لە ئاگرکەوتنەوەکان بە ئەنقەست و بۆ بەرهەمهێنانی خەڵووزە.
رووبەری دارستانەکانی زاگرۆس شەش ملیۆن هێکتارە، رێکخراوی پاراستنی ژینگەی ئێران دەڵێت، 50٪ـی ئاوی ژێرزەویی ئەو وڵاتە لەو دارستانانەوە سەرچاوە دەگرن.