زیاتر لە سێ ملیۆن مەتر دووجا سەوزایی لە شاری سلێمانی هەیە

 

 

عەلی حامید، گوتەبێژی بەڕێوەبەرایەتیی باخچەکانی سلێمانی ئەمڕۆ سێشەممە 16ی نیسان بە رادیۆی رووداوی گوت، لەنێو شاری سلێمانیدا نزیکەی 600 باخچە، پارک و بلوار هەن، کە زیاتر لە سێ ملیۆن و 290 هەزار مەتر دووجا سەوزایی لەخۆدەگرن.

 

بە گوتەی گوتەبێژی بەڕێوەبەرایەتیی باخچەکانی سلێمانی، حەوت دانە لەوان پارکی گەورەن، 83یان بلوارن و 506 دانەکەی دیکەش باخچەن و پێکەوە سێ ملیۆن و 294 هەزار و 593 مەتر دووجا سەوزایی لەخۆدەگرن.

 

نزیکەی 60%ی ئەو دارانەی لەو شوێنانەدا هەن لەو جۆرەن کە بەردەوام سەوزن و لەگەڵ ژینگەی ناوچەکە دەگونجێن، ئەمەش وەکو عەلی حامید ئاماژەی پێدا.

 

ساڵی رابردوو 29 بلوار و باخچە دروستکراون و نۆژەن کراونەتەوە؛ گوتەبێژەکەی بەڕێوەبەرایەتیی باخچەکانی سلێمانی دەڵێت، ئێستاش نزیکەی 10 پڕۆژەی باخچە و بلوار لەلایەن کەرتی تایبەتەوە جێبەجێ دەکرێن.

 

لەبارەی نۆژەنکردنەوەی پارکی ئازادیی شاری سلێمانییەوە، عەلی حامید ئەوەی خستەڕوو، "نزیکەی ساڵ و نیوێکە سەرقاڵی نۆژەنکردنەوەی پارکەکەین" و خەڵکی خۆبەخش و وەبەرهێنەران لە نۆژەنکردنەوەی پارکەکەدا هاوکارن.