کۆمیسیۆن داوای خەرجکردنی پارەی کارمەندەکانی لە سوودانی دەکات

 

بە گوێرەى نووسراوێک کە چوارشەممە، 15ى کانوونى دووەمى 2025، عومەر ئەحمەد، سەرۆکى کۆمیسیۆنى باڵاى سەربەخۆى هەڵبژاردنەکانى عێراق ئاراستەى نووسینگەى سەرۆکوەزیرانى عێراقى کردووە، داوا دەکات سەرۆکوەزیران، وەزارەتى دارایی فیدراڵ رابسپێرێت بۆ خەرجکردنى پارەى کارمەندانى سەر سندووقى دەنگدانى هەڵبژاردنى ئەنجوومەنى پارێزگاکانى عێراق بە"زووترین کات".

 

عیماد جەمیل، سەرۆکى تیمى رۆژنامەڤانى کۆمیسیۆنى باڵاى سەربەخۆى هەڵبژاردنەکانى عێراق بە تۆڕى میدیایی رووداوى گوت: "تاوەکو ئێستا پارەى کارمەندانى سەر سندووقى  دەنگدانى ئەو هەڵبژاردنە خەرج نەکراوە و زانیارییەکانیشیان ئاراستەى وەزارەتى دارایی عێراق کردووە."

 

هەڵبژاردنى ئەنجوومەنى پارێزگاکانى عێراق لە 18ى کانوونى یەکەمى 2023 کرا کە یەکەمجار بوو لە دواى 10 ساڵ ئەو هەڵبژاردنە بکرێت.

 

بە گوێرەى نووسراوەکە، کۆمیسیۆن سەرجەم زانیارییەکانى تایبەت بە خەرجکردنى پارەى کارمەندانى سەر سندووقەکانى دەنگدانى لە 28ى ئابى 2024ـەوە ناردووە بۆ وەزارەتى دارایی، بەڵام ئەو وەزارەتە پارەکانى خەرج نەکردوون، کە لە نێوان 50 هەزار بۆ 350 هەزار دینارە.

 

عیماد جەمیل گوتی: "لەو هەڵبژاردنە زیاتر لە 300 هەزار کارمەندى سەر سندووقەکانى دەنگدان بەشداربوون."