رووداو دیجیتاڵ
نرخی گۆشت لە بازارەکانی هەرێمی کوردستان دابەزی. بازرگانێکی ئاژەڵ دەڵێت، ئاژەڵی زیندوو کیلۆی لە نۆ هەزارەوە بووە بە هەشت هەزار دینار. گۆشفرۆشێکیش لە سلێمانی دەڵێت، ئەوەی هەرزان بووە ئاژەڵی هیندییە.
نیهاد ئەسعەد، بازرگانی فرۆشتنی ئاژەڵ لە هەولێر، ئەمڕۆ یەکشەممە بە تۆڕی میدیایی رووداوی گوت: "ئەمڕۆ ئاژەڵی بچووک کە زیاتر کاوڕن، بە زیندوویی کیلۆیی بە 8 هەزار دینارە، لەکاتێکدا چەند رۆژی رابردوو 9 هەزار دینار بوو".
هەروەها لە هەرێمی کوردستان کاوڕی هاوردەکراوی سووری کیلۆی بە 7 هەزار 500 دینارە.
نیهاد ئەسعەد گوتی: "لە قەسابەکان کیلۆی گۆشتی کاوڕ بە نزیکەی 17 هەزار دینارە. ئێستا زیاتر کاوڕ هەیە و بەرخ لە بازاڕدا زۆر کەم و گرانە، چونکە کاتی پێگەیشتنیان نییە".
سەرەتای مانگی تەممووزی ئەم ساڵ، کیلۆیەک گۆشتی کاوڕ 22 هەزار دینار بوو، هاوکات کیلۆیەک گۆشتی بەرخ 24 هەزار دینار بوو.
هەروەها گۆشتی گۆلک دابەزیوە و کیلۆیەک بە ئێسکەوە بە 13 هەزار دینارە و نەرمەش بە 15 بۆ 16 هەزارە، لەکاتێکدا پێشتر نەرمە 20 هەزار دینار بوو.
ئەو ئاژەڵفرۆشە ئاماژەی بەوەکرد، لەکاتی هاوردەکردنی ئاژەڵدا لە دەروازەکاندا سێ رۆژ ئاژەڵەکان کەرەنتین دەکرێن و بۆ بچووک 25 دۆلار و جوانەگاش 50 دۆلار وەردەگیرێت، جگە لە گومرگ. گوتیشی: "بە گومرگ و پارەی کەرەنتینەوە بۆ ئاژەڵی بچووک 75 هەزار و گەورەش نزیکەی 100 دۆلار وەردەگیرێت".
نیهاد ئەسعەد داوای لە حکومەتی هەرێمی کوردستان کرد، کە پارەی کەرەنتینە و گومرگ کەمتر بکەنەوە و گوتی، "تاوەکو نرخی بەرز بێت پارەی زیاتر لەسەر خەڵک دەکەوێت، ئەگەر بۆ ئاژەڵێکی بچووک ئەو 75 هەزار دینارە لاببرێت نرخ زۆر زیاتر دێتە خوارەوە".
ئەو بازرگانەی گۆشت ئاماژەی بە هۆکاری دابەزینی نرخ کرد و گوتی، رۆژانە نزیکەی پێنج هەزار ئاژەڵ لە هەولێرەوە دەبرایە نێوەڕاست و خوارووی عێراق، ئێستا خواستی کەمتری لەسەرە، چونکە بازگەکانی حەشدی شەعبی بۆ هەر بارهەڵگرێک داوای 2 ملیۆن و 500 هەزار دینار باج دەکەن.
گۆشتفرۆشێک لە سلێمانی: نرخ دانەزیوە
نەجمەدین عەلی، گۆشتفرۆش لە سلێمانی ئەمڕۆ بە رووداوی گوت: "ئەوەی هەیە و دەڵێن هەرزان بووە ئاژەڵی هیندی و هاوردەکراوە، ئەگەرنا بەرخی کوردی خۆمانە ئێستاش کیلۆی بە 24 هەزار دینارە و کاوڕی خۆمانیش 22 هەزار".
ئەو هاونیشتمانییە گوتی: "ئەو گۆشتەی بەناوی گوێرەکەوە بە هەرزان دەفرۆشرێت جوانەگایە، ئەگەرنا گوێرەکەی خۆماڵی ئێستاش نرخی بەرزە و کیلۆیەک نەرمە لە سلێمانی بە 22 هەزار دینارە".
ئاژەڵی بچووک لە وڵاتانی جۆرجیا، سووریا، ئەرمینا، ئێران و تورکیاوە هاوردەی دەکرێت. هەروەها جوانەگا لە بەڕازیل، هۆڵەندا و هیندستان.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ