لە وانی باکووری کوردستان بوومەلەرزە روویدا

 

 

دەزگای بوومەلەرزەزانیی قەندیللی رایگەیاند، کاژێر 06:32 خولەکی ئەمڕۆ پێنجشەممە 13ی تەممووزی 2023 بوومەلەرزەیەک بە گوڕی 4.0 پلەی رێختەر لە شارۆچکەی چاڵدێران سەر بە پارێزگای وان روویدا. بوومەلەرزەکە لە قوڵایی 5 کیلۆمەتر تۆمار کراوە.

 

بەڵام ماڵپەڕی سەرۆکایەتیی کارەساتی لەناکاو و فریاگوزاریی تورکیا - ئافاد دەڵێت، گوڕی بوومەلەرزەکە 3.6 پلەی رێختەر بووە و لە قوڵایی 8.2 کیلۆمەتر تۆمار کراوە.

 

تاوەکو ئێستا هیچ زانیارییەک لەبارەی زیانی بوومەلەرزەکە بڵاونەکراوەتەوە.

 

دوای بوومەلەرزە وێرانکەرەکانی مەرەش لە 6ی شوباتدا کە لە 11 پارێزگای باکووری کوردستان و تورکیا بووە هۆی گیانلەدەستدانی 50 هەزار و 500 کەس، پاشلەرزەکان بەردەوامن.

 

تائێستا زیاتر لە 10 هەزار پاشلەرزە تۆمارکراون کە گەورەترینیان بە گوڕی 6.4 پلەی رێختەر لە پارێزگای هاتای تۆمارکرا.

 

بوومەلەرزەکان بوونەتە هۆی گیانلەدەستدانی نزیکەی 6 هەزار کەسیش لە رۆژئاوای کوردستان و سووریا.