سەرۆک بارزانی و باڵیۆزی سوێد ئاساییکردنەوەی دۆخی شنگال تاوتوێ دەکەن
رووداو دیجیتاڵ
سەرۆک مەسعود بارزانی پێشوازی لە باڵیۆزی سوێد لە عێراق کرد. بارەگای بارزانی لە راگەیێندراوێکدا دەڵێت، جەختیان لە جێبەجێکردنی رێککەوتننامەی شنگال و ئاساییکردنەوەی دۆخی ناوچەکە کردووەتەوە.
نیوەڕۆی ئەمڕۆ دووشەممە، 13-03-2023، سەرۆک بارزانی لە پیرمام پێشوازی لە جێسیکا سڤاردسترۆم، باڵیۆزی سوێد لە عێراق کرد. بەگوێرەی راگەیێندراوەکەی بارەگای بارزانی، لە دیدارەکەدا بارودۆخی سیاسیی عێراق و ناوچەکە و کۆسپەکانی بەردەم سەقامگیریی عێراق و جێبەجێبوونی بەرنامەی حکومەتی عێراق تاوتوێ کرا.
وەکو لە راگەیێندراوەکەدا هاتووە، لە بەشێکی کۆبوونەوەکەیاندا، سەرۆک بارزانی و جێسیکا سڤاردسترۆم باسییان لە "هزری تووندڕۆیی" کردووە و "رۆشنایی خرایە سەر هەڕەشەکانی هزری تووندڕۆیی و تاییفەگەری لەسەر داهاتووی عێراق و ناوچەکە."
سەرۆک بارزانی و باڵیۆزی سوێد لە عێراق جەختیان لە "جێبەجێبوونی رێککەوتننامەی شنگال" و ئاساییکردنەوەی دۆخی سنوورەکە کردەوە.
جێسیکا سڤاردسترۆم، باڵیۆزی سوێد لە عێراق رایگەیاند، وڵاتەکەی پاڵپشتی لە سەقامگیریی عێراق و هەرێمی کوردستان دەکات و گوتی، خوازیاری ئەوەن پەیوەندییەکانی نێوان سوێد و هەرێمی کوردستان و عێراق لە بوارە جیاجیاکان پەرەی زیاتری پێبدرێت.
سەرۆک بارزانی سوپاسی گەل و حکومەتی سوێدی کرد بۆ پشتیوانییان لە هەرێمی کوردستان و رایگەیاند، "هەمیشە لە رۆژانی تەنگانەدا دەرگەیان بەڕووی گەلی کوردستان کردووەتەوە و پاڵپشتیی دۆزی گەلی کوردستان" بوون.