نوێنەری خورماتوو لە پەرلەمانی عێراق: 3500 خێزان لە دەرەوەی شارەکەدا دەژین

 

 

بەگوێرەی دوایین هەڵبژاردنی پەرلەمانی عێراق، کورد زۆرینەی قەزای خورماتوو پێکدەهێنێت، بەڵام پۆستە باڵاکانی قەزاکە وەکو قایمقام، سەرۆکی شارەوانی و پۆلیس لەدەستی کورددا نەماون. رۆژی یەکشەممە 12-02-2023 مەلا کەریم شکوور، ئەندامی ئەنجوومەنی نوێنەرانی عێراق بە تۆڕی میدیایی رووداوی گوت، "کورد ئێستا پۆستە بێ دەسەڵاتەکانی هەیە، وەکو وەقفی سوننە و بەڕێوەبەری نەخۆشخانە، ئەوانی دیکە لە دەستی کورددا نەماون."

 

مەلا کەریم شکوور بە 12 هەزار و 159 دەنگ بووەتە ئەندامی ئەنجوومەنی نوێنەرانی عێراق، باسی لە رێژەی کورد لە قەزاکە کرد و گوتی، "کورد 40%ی دانیشتووانی خوورماتوو پێکدەهێنێت، بەڵام پۆستە گرنگەکان لای کورد نەماون؛ ئێمەی کورد دەتوانین پۆستەکان وەربگرینەوە، بەڵام دڵنیایی لە دۆخەکە نییە و باڵانسی هێز نییە، بۆیە کادری کورد ئامادە نییە پۆست وەربگرێت."

 

ساڵی 2010 بەهۆی تەقینەوە و ئاڵۆزییەوە، بەتایبەت دژی نەتەوەی کورد، بەشێکی هاونیشتمانیان قەزاکەیان چۆڵ کرد، هەروەها دوای رووداوەکانی 16ی ئۆکتۆبەری 2017 زۆرینەی کورد شارەکەیان چۆڵکرد، کە تائێستاش 3500 خێران نەگەڕاونەتەوە سەر ماڵ و زێدی خۆیان.

 

ئەوانەی لە خوورماتوو ئاوارە بوون زۆرینەیان لە کەرکووک، هەولێر، سلێمانی و گەرمیان نیشتەجێن، کەریم شکوور دەڵێت، "بەشێک لەوانەی نایەنەوە قەزاکە ماڵیان سووتێندراوە؛ بەشێکی دیکەش متمانەیان بە دۆخەکە نییە، دۆخی ئەمنی ئێستا باشە، بەڵام باڵانسی هێز نییە و دەترسن دۆخەکە خراپ ببێتەوە."

 

قەزای خورماتوو یەکێکە لە ناوچە دابڕاوەکانی باشووری کوردستان و لەڕووی کارگێڕییەوە سەر بە پارێزگای سەڵاحەدینە، لە رووداوەکانی 16ی ئۆکتۆبەردا زۆرینەی ماڵی هاونیشتمانیان لەلایەن گرووپە چەکدارەکانەوە سووتێندران و تەقێندرانەوە.