پەرلەمانتارێک باسی هۆکاری گرژییەکەی هۆڵی پەرلەمان بۆ رووداو دەکات
لەبارەی دروستبوونی گرژی و دەمەقاڵێ لەنێوان پەرلەمانتارانی فراکسیۆنی پارتی و نەوەی نوێ، ئەندامێکی پەرلەمانی کوردستان لە فراکسیۆنی پارتی ئاماژەی بەوە کرد، رووداوەکە بەهۆی هەڵەتێگەیشتنەوە بووە.
رزگار عیسا سوار، پەرلەمانتاری فراکسیۆنی پارتی لە پەرلەمانی کوردستان بە رووداوی راگەیاند، سیپان ئامێدی، پەرلەمانتاری نەوەی نوێ قەڵەمێک دەگرێتە یەکێک لە پەرلەمانتاری فراکسیۆنی پارتی و بەوهۆیەوە کاردانەوەی بەشێک لە پەرلەمانتارانی لێکەوتەوە.
لەکاتی خوێندنەوە بۆ ماددەکانی حەوتەم، هەشتەم و نۆیەم لە پرۆژەیاسای چاکسازی دەمەقاڵێ لەنێوان پەرلەمانتارانی فراکسیۆنی پارتی و نەوەی نوێ دروستبووە بەهۆی جیاوازی بیروبۆچوونیان و بەکارهێنانی چەند وشەیەک بەرامبەر یەکدی.
دوای دروستبوونی گرژی و وەستانی کۆبوونەوەکە، جارێکی دیکە کۆبوونەوەی پەرلەمانی کوردستان دەستیپێکردەوە.