جۆرجیا کۆنسوڵخانەى شانازی لە هەولێر دەکاتەوە

 

زازا کاندلاکى، باڵیۆزى نائامادەى جۆرجیا لە عێراق رایگەیاند، وڵاتەى دەیەوێت کۆنسوڵخانەی شانازی لە هەولێرى پایتەختى هەرێمى کوردستان و پارێزگاى بابل بکاتەوە، ئەوەش دوای تەواوبوونى رەزامەندییە فەرمییەکان بۆ کردنەوەیان. 

 

بەپێی زانیارییەکانی رووداو، بڕیارە کۆتایی ئەم هەفتەیە زازا کاندلاکى سەردانی هەولێر بکات و لەگەڵ لایەنە پەیوەندیدارەکان کۆببێتەوە بەمەبەستی جێبەجێکردنی کاروبارەکانی کردنەوەی کۆنسوڵخانەی وڵاتەکە.

 

ئەو گوتانەى بەرپرسەکەى جۆرجیا لە میانى کۆبوونەوەیەکدا بوو لەگەڵ لەتیف رەشید، سەرۆککۆماری عێراق و فوئاد حوسێن، وەزیرى دەرەوەى عێراق لە بەغدا.

12ى کانوونى یەکەمى 2022، وەزارەتى دەرەوەى عێراق لە راگەیێندراوێکدا ئاشکرایکرد، لەو دیدارەدا زازا کاندلاکى، باڵیۆزى نائامادەى جۆرجیا لە عێراق ئاماژەى بەوەداوە کە نزیکەى سێ هەزار رەوەندى جۆرجى لە عێراقن، کە ژمارەیەکی زۆریان لە پارێزگای دهۆکن و داوا لە وڵاتەکەشی دەکات بۆ پەلەکردن لە کردنەوەى باڵیۆزخانەى جۆرجیا لە بەغدا.

 

43 کۆنسوڵخانە، نووسینگەی کۆنسوڵخانە، نووسینگەی باڵیۆزخانە و ئاژانسی هاریکاری نێودەوڵەتی لە هەرێمی کوردستاندا هەن.