هەورامان گەچێنەیی سکاڵای لەسەر عەتا ئەحمەد تۆمار کرد

 

مامۆستا هەورامان گەچێنەیی رۆژێک دواى گەڕانەوەى لە سعودیە و مەککە، هاتە دادگەى لێکۆڵینەوەى حەوتى سلێمانى. گەچێنەیی تەنیا حاجى کوردى ئەمساڵ بوو، کە هاتنەوەکەى بە چوونە لاى پۆلیس و دادوەر دەستیپێکرد و لەوێ سکاڵاى لەسەر وەستا عەتاى دارتاش تۆمارکرد، بەوپێیەى لەبەردەم میدیاکاندا 250 هەزار دۆلار (25 دەفتەر دۆلار)ـی خستە پاڵی.

 

گەچێنیى روو بە دەیان مایک و چاوى کامێرا، گوتى "گوتەکانى کاک وەستا عەتا لە ماڵی جاڵجاڵۆکە دەچن، خوداش دەفەرمووێت (اوهن البیوت لبیت العنکبوت) - لاوازترین ماڵ، ماڵی جاڵجاڵۆکەیە".

 

سەرەتاى ئەو کێشەیە دەگەڕێتەوە بۆ ساڵى 2010، کاتێک بە سەرمایەى 400 هەزار دۆلار (40 دەفتەر)، کۆمپانیاى عەتا ئەحمەد، بۆ دروستکردنى دەرگا و پەنجەرە، پى ڤى سى و کەنتۆر لەنێوان عەتا ئەحمەد بە 100 هەزار دۆلار، هەورامان گەچێنەیى بە 100 هەزار دۆلار و کەسێکى دیکە بە 200 هەزار دۆلار دامەزرا، ئەم قسانە وەستا عەتا بۆ رووداوى باسکردن.

 

هەورامان گەچێنەیى، هاوپشکى عەتا ئەحمەد گوتی "ئەگەر ئەم بابەتە قەرز و زەرەر بوو، ئەو بۆچی 6 دەفتەرى بۆ گەڕاندمەوە، ئەگەر 6 دەفتەر بوو، بۆ من 25 دەفتەرم خواردبێت؟".

 

کۆمپانیا پشکدارییەکە، دواى کەمتر لە سێ ساڵ لە دروستبوونى، بەهۆى بێبازاڕییەوە، داخرا و هەڵوەشایەوە، ئەو 25 دەفتەر دۆلارەی ئێستا خراوە پاڵ هەورامان گەچێنەیى، زۆرینەى پارەى تێچوو، قەرز و زیانى کۆمپانیاکەیە.

 

پێشتر، ئەم بابەتە لاى کۆمەڵى دادگەری لیژنەى بۆ پێکهات، بەڵام ساڵێکە عەتا ئەحمەد، ئەنجامەکەى هەڵوەشاندووەتەوە و سکاڵاى تۆمارکردووە، وەستا عەتا بە رووداوى گوت "لەسەرم بووەستن، سێ -  چوار رۆژێکى دیکە هەموو بەڵگەکان لەدژى گەچێنەیی دەخەمەڕوو".