وەزارەتی رۆشنبیری: ئاژانسی فرانس پرێس سکاڵای لەسەر کۆمپانیای HD BOX تۆمار کردووە

 

دڵشاد ئەبوبەکر، پارێزەری کۆمپانیای HD BOX بە رادیۆی رووداوی راگەیاند: "ئیدارەی سلێمانی رۆژی 26-2-2023 پەخشی کۆمپانیاکەمانی راگرتووە بە بیانووی بوونی کەموکوڕی لە مۆڵەت، بەڵام کە سەردانی وەزارەتی رۆشنبیریمان کرد هیچ کێشە لە مۆڵەتەکەمان نەبووە و دواتر گوتیان: سکاڵایەکتان لەسەرە، بەڵام لە کۆنگرەیەکی رۆژنامەڤانیدا بەڕێوەبەری کۆمپانیاکە رایگەیاند کە هیچ سکاڵایەکمان لەسەر نییە." 

 

بەگوتەی دڵشاد ئەبوبەکر، ئیدارەی سلێمانی بە "ئەنقەست" پەخشی کۆمپانیاکەیانی راگرتووە و بابەتەکەیان بە "سیاسی" کردووە. دەشڵێت، بەڵێنیان پێدابوون رۆژی پێنجشەممەی رابردوو پەخشی کۆمپانیاکەیان بگەڕێننەوە، بەڵام پابەند نەبوون، بۆیە دەڵێت: "ئەگەر لەم چەند رۆژە پەخشەکەیان نەگەڕێتەوە ئەوا هەموو راستییەکان بۆ بەشداربووان و رای گشتی دەیخەنەڕوو."

 

پارێزەری ئەو کۆمپانیایە باس لەوە دەکات کە چەند کۆمپانیایەکی بێ مۆڵەت لە سلێمانی کاردەکەن و پەخشیان هەیە، "بەڵام کۆمپانیاکەی ئێمە هیچ گرفتێکی یاسایی نییە و پەخشەکەشمان زۆرباشە و زۆر فراوانبووە و ژمارەی بەشداربووانمان لە سنووری پارێزگاکانی سلێمانی و هەڵەبجە و ئیدارەی راپەڕین نزیکەی 100 هەزاری تێپەڕاندووە، بۆیە کۆمەڵێک کێشەیان بۆ دروستکردووین."

 

لەبارەی هەڵوێستی وەزارەتی رۆشنبیری لەسەر کێشەکە، دڵشاد ئەبوبەکر گوتی: "لەو رۆژەوەی پەخشمان وەستاوە وەزیری رۆشنبیری تائێستاش راستەوخۆ لەگەڵمان لەسەر هێڵە. لە دوایین کۆبوونەوەمان لەگەڵی کە رۆژی پێنجشەممە 9-3-2023 کردمان بەڵێنی پێداین کە رۆژی یەکشەممە یان دووشەممە پەخشمان دەبێتەوە لە هەموو ئەو شوێنانەی راگیرابوو."

 

بەڵام شێروان عەوڵا، بەڕێوەبەری گشتیی راگەیاندن و چاپ و بڵاوكردنەوەی وەزارەتی ۆشنبیری قسەکانی پارێزەری کۆمپانیاکەی رەتکردەوە و گوتی، لایەنێکی دیکە سکاڵای لەسەر تۆمار کردوون.

 

شێروان عەوڵا بە رادیۆی رووداوی گوت: "بەهۆی ئەوەی فریکوێنسی پەخشی کۆمپانیای HD BOX تێکەڵی فریکوێنسی ئاژانسی هەواڵی فرانس پرێس AFP  بووە، فرانس پرێس لە دەستەی گەیاندن و پەیوەندییەکانی عێراق سکاڵای تۆمارکردووە، بەو هۆیەوە پەخشەکەیان راگیراوە و ئێستا لیژنەیەک پێکهێنراوە لە وەزارەتەکانی رۆشنبیری و ناوخۆ بۆ بەدواداچوون بۆ ئەو گرفتە دەکەن، ئەمڕۆ یان سبەی پەخشەکەیان دەگەڕێتەوە."