لە تەکییە بەهۆی کێشەی زەویوزارەوە هاونیشتمانییەک کوژرا و یەکێکی دیکەش بریندارە

 

ئەمڕۆ (یەکشەممە، 10-12-2023) مەمەد رەشید، بەڕێوەبەری ناحیەی تەکیەی کاکەمەند لە سنووری قەزای چەمچەماڵ لە پارێزگای سلێمانی بە تۆڕی میدیایی رووداوی گوت "دوو خێزان کە خزمی یەکدین و لە یەک بنەماڵەن، لەسەر میرات و زەویوزار بووەتە شەڕیان، لە ئەنجامدا کوژراوێک و بریندارێک هەیە."

 

بەڕێوەبەری ناحیەی تەکیە ئاماژەی بەوەکرد، "بکوژ ئەو کەسەیە کە ئێستا خۆی بریندارە و لەلایەن پۆلیسەوە دەستبەسەرە."

 

شەریف رەحیم، جێگری بەڕێوەبەری تەندروستیی چەمچەماڵ بە تۆڕی میدیایی رووداوی گوت، تەرمی کوژراوەکە براوەتە فریاکەوتنی چەمچەماڵ، کە پیاوێکە لە دایکبووی ساڵی 1959ـیە و خێزاندار بووە، بەڵام بریندارەکە نەبراوەتە نەخۆشخانەکانی سنوورەکەیان.

 

بەگوێرەی پۆلیسی هەرێمی کوردستان، ساڵی رابردوو 455 رووداوی کوشتنی ئەنقەست، بە هەڵە و خۆکوشتن لە هەرێمی کوردستان تۆمارکراون.