هێمن میرانی: ئەم ساڵ هەرێمی کوردستان بایۆمەتری و هەژماری من تەواو دەکات

 

 

هێمن میرانی، بەڕێوەبەری گشتیی دیوانی وەزارەتی ناوخۆی هەرێمی کوردستان، ئەمڕۆ سێشەممە رایگەیاند، "حکومەتی کوردستان تاوەکو سەری ساڵ بایۆمەتری و هەژماری من تەواو دەکات."

 

ئەو بەرپرسەی وەزارەتی ناوخۆ باسی لە کۆبوونەوەی دوو رۆژی رابردووی حکومەتی هەرێمی کوردستان و حکومەتی عێراق لە هەولێر کرد و گوتی، "بەرهەمی کۆبوونەوەی هاوبەشی نێوان هەردوو حکومەت؛ ئەنجوومەنی وەزیرانی عێراق بڕیاریدا کە تاوەکو کۆتایی ساڵ مووچەی فەرمانبەرانی هەرێمی کوردستان بەردەوام دەبێت."

 

هەروەها ئامانج رەحیم، سکرتێری ئەنجوومەنی وەزیرانی هەرێمی کوردستان رایگەیاند، "ئەنجوومەنی وەزیرانی عێراق لە کۆبوونەوەی ئەمڕۆ دەنگیدا لەسەر پەسەندکردنی راسپاردەی کۆبوونەوەی هاوبەشی دوێنێی ئەنجوومەنی ئابووری فیدڕاڵ و هەرێمی کوردستان."

 

سکرتێری ئەنجوومەنی وەزیرانی هەرێمی کوردستان دەڵێت، ئەنجوومەنی وەزیرانی عێراق دەنگداوە بە "ناردنی مووچە راگیراوەکانی هەرێمی کوردستان لە مانگی شوباتەوە تاوەکو مانگی ئاب و، بەردەوام بوون لەسەر خەرجکردنی مووچەکانی هەرێمی کوردستان تاوەکو کۆتایی ساڵی دارایی 2024."

 

ئەمڕۆ ئەنجوومەنی وەزیرانی عێراق بڕیاریدا، مووچەی مانگی حەوتی هەرێمی کوردستان خەرج بکرێت.

 

پێشتر حکومەتی عێراق مووچەی مانگی هەشتی بۆ هەرێمی کوردستان ناردبوو، بەڵام وەزارەتی دارایی هەرێمی کوردستان وەکو مووچەی مانگی حەوت دابەشی کرد.

 

ئەم پێشهاتانە دوای ئەوە دێن، دوو رۆژی لەسەر یەک لە 8 و 9ی ئەم مانگەدا، ئەنجوومەنی وەزاریی ئابووریی عێراق و ئەنجوومەنی باڵای ئابووریی هەرێمی کوردستان کۆبوونەوە و شەوی رابردوو راگەیێندراوێکی هاوبەشیان بڵاوکردەوە.

 

لە راگەیێندراوەکەدا هاتووە، "ئەنجوومەنی وەزاریی بۆ ئابووری بڕیاری دا بە پێشکەشکردنی راسپاردەیەک بۆ ئەنجوومەنی وەزیرانی فیدراڵ بۆ ئاڕاستەکردنی وەزارەتی دارایی فیدراڵ بۆ چارەسەرکردن و ناردنی مووچە راگیراوەکانی هەرێم [ـی کوردستان]، ئەوانەی بەهۆی تەواونەکردنی بایۆمەتری دوورخرابوونەوە."