وەزیری بازرگانی بۆ رووداو: رێگریکردن لە ناردنی بەرهەمی کوردستان بۆ پارێزگاکانی عێراق بە شێوەیەکی کاتی لابرا
رووداو دیجیتاڵ
وەزیری بازرگانی و پیشەسازیی هەرێمی کوردستان دەڵێت، رێگریی بەردەم شۆفێری بارهەڵگرەکان بۆ چوونە ناوچەکانی ژێر دەسەڵاتی حکومەتی عێراق بە شێوەیەکی کاتی لابرا.
کەمال موسلیم، وەزیری بازرگانی و پیشەسازیی هەرێمی کوردستان ئەمڕۆ شەممە بە تۆڕی میدیایی رووداوی گوت، بڕیار دراوە "بەشێوەیەکی کاتی" رێگریکردن لەو بارهەڵگرانە بوەستێت کە بارەکانیان لە هەرێمی کوردستانەوە دەبەنە نێوەڕاست و خوارووی عێراق.
زیاتر لە هەفتەیەک بوو جگە لە سەوزە و میوەی هەرێمی کوردستان، حکومەتی عێراق بێ گومرگ رێگەی نەدەدا هیچ بارهەڵگرێک بەرهەمی نێوخۆی هەرێمی کوردستان یان هاوردەکراو بباتە نێوەڕاست و خوارووی عێراق، ئەوەش بە پاساوی نەبوونی مۆڵەتی بەغدا لەلایەن کۆمپانیاکانی هەرێمی کوردستانەوە.
لەبارەی چارەسەرکردنی بنەڕەتیی کێشەکە و لابردنی ئاستەنگییەکان بەشێوەیەکی هەمیشەیی، وەزیری بازرگانی و پیشەسازی هەرێمی کوردستان گوتی، "هەندێک رێکار ماون کە دەبێت تەواو بکرێن."