دەست بەسەر ئاژەڵە ماڵییەکانی ژێر پردەکەی سلێمانیدا دەگیرێت

 

 

ژمارەیەک ئاژەڵدۆست ناڕەزاییان دەربڕیوە بەوەی ئاژەڵی ماڵی و پەلەوەری کێوی لە ژێر پردەکەی سلێمانی، "بازرگانیی ناتەندروست"یان پێوە دەکرێت، لەسەر ئەو بنەمایە داواکاری گشتیی سلێمانی فەرمانی کردووە دەست بەسەر ئەو ئاژەڵ و پەلەوەرانەدا بگیرێت.

 

هەڵمەتەکە لەسەر داوای رێکخراوی هانای ئاژەڵان بووە. شادی عەلی، سەرۆکی رێکخراوەکە ئەمڕۆ هەینی بە تۆڕی میدیایی رووداوی گوت، "ئەو هەڵمەتەی ئەمڕۆ بەڕێوەمان برد، بە هاوکاری پۆلیسی دارستان و لیژنەکانی قایمقامییەت بووە و بەردەوامیش دەبێت."

 

هەڵمەتەکە دژی بازرگانیی ناتەندروستە بە ئاژەڵی ماڵی و کێوی و پەلەوەری کێوی. شادی عەلی دەڵێت، "ئەمڕۆ دەستیان بەسەر 11 پشیلەی ماڵیی زینە و بازێکدا گرتووە."

 

سەرۆکی رێکخراوی هانای ئاژەڵان باسی لەوەش کرد، "ئاژەڵەکانی ژێر پردەکە زۆر ئازار دەدرێن و بە شێوەیەکی خراپ بەخێودەکرێن بۆ فرۆشتن و بازرگانیی پێوەکردن. جگە لە ژێر پردەکە، لە هەر شوێنێکی دیکە بەو شێوەیە مامەڵە لەگەڵ ئاژەڵی ماڵیدا بکرێت، دەستی بەسەردا دەگیرێت."

 

ئەو 11 پشیلەیەی دەستیان بەسەردا گیراوە، تەندروست نەبوون و هەموویان رەوانەی سەنتەری پزیشکیی ڤێتێرنێری کراون، بڕیارە دواتر رێکخراوی هانای ئاژەڵان رادەستی ژینگەدۆستانی بکات.

 

ئەمڕۆ لە ژێر پردەکەی سلێمانی لەلایەن خەڵکەوە سەگ، بەچکەی گورگ، رێوی، مار و دووپشکیش بۆ فرۆشتن دانراوە، "بەڵام پێش گەیشتنی لیژنەکانی قایمقامییەت و پۆلیسی دارستان بە لیژنەکەیان زانیوە و هەڵاتوون."

 

ژێر پردەکەی سلێمانی، دەکەوێتە شەقامی مەولەوی؛ بەنێوبانگە بەوەی زۆرترین ئاژەڵ و پەلەوەری ماڵی و کێویی تێدا دەفرۆشرێت.