لە کۆیە تەقە لە ماڵی کەسێک کرا و هاونیشتمانییەک کوژرا

 

سەڵاح سەید عەوڵڵا تەمەنی 74 ساڵ بوو، تەقە لە ماڵەکەی کراوە و بە گوتەی تەندروستیی کۆیە بۆ رووداو، شەش بۆ حەوت گولـلەی بەرکەوتووە و ماڵەکەیشی ئاگری گرتووە.

 

رووداوەکە لە گەڕەکی زانست روویداوە. شیروان جەلال، جێگری بەڕێوەبەری تەندروستیی کۆیە بە رووداوی گوت، تەرمەکەی گەیێندراوەتە نەخۆشخانە و دەرکەوتووە شەش بۆ حەوت گولـلەی بەرکەوتووە.

 

بەگوێرەی زانیارییە سەرەتاییەکان، کوژراو و بکوژەکە ناسیاوییان لەگەڵ یەکدی هەبووە. کوژراو کاری فرۆشتنی قوماشی کردووە.

 

هێشتا نازانرێت هۆکاری سەرەکیی رووداوەکە چییە، بەڵام باس لەوە دەکرێت بەهۆی کێشەیەکی کۆمەڵایەتییەوە بووە.