فەرماندەیی ئۆپەراسیۆنە هاوبەشەکانی عێراق: لە حەمرین چوار چەکداری داعش کوژران

 

ئەمڕۆ شەممە (9-11-2024) شانەی راگەیاندنی ئەمنی لە فەرماندەیی ئۆپەراسیۆنە هاوبەشەکانی عێراق رایگەیاند، بەپشتبەستن بە رێنماییەکانی محەممەد شیاع سوودانی، فەرماندەی گشتیی هێزە چەکدارەکان، "هێزەکانمان بەردەوامن لە سەرکەوتنی بەرچاو و لەنێوبردنی مۆڵگەکانی تیرۆر و بەدواداچوون بۆ شکستپێهێنانیان."

 

لە راگەیێندراوەکەدا هاتووە "بەسوودوەرگرتن لە سەرچاوە مرۆیی و مەیدانییەکان، لە رێی بەدواداچوونی چڕی فەرماندەیی ئۆپەراسیۆنە هاوبەشەکان لە دوو رۆژی بەردەوامدا، شوێنی مەفرەزەیەکی داعش دەستنیشانکرا، کە چوار کەس بوون لە زنجیرە چیای حەمرین لە سنووری کەرتی فەرماندەیی ئۆپەراسیۆنەکانی کەرکووک لە سنووری جیاکەرەوەی فەرماندەیی ئۆپەراسیۆنەکانی سەلاحەدین."

 

بەپێی راگەیێندراوەکە، کاژێر 18:20ـی ئەمڕۆ، بەسوودوەرگرتن لە فڕۆکەی جەنگیی ئێف16، ئەو مەفرەزەیان کردووەتە ئامانج و ئەندامەکانی کوژراون و شوێنەکەشیان خاپوور کراوە.

 

شانەی راگەیاندنی ئەمنی لە فەرماندەیی ئۆپەراسیۆنە هاوبەشەکانی عێراق دەڵێ: دواتر وردەکاریی زیاتر لەوبارەوە دەخەینە روو.

 

رۆژی 22-10-2024، سەرۆکوەزیرانی عێراق رایگەیاندبوو، لە ئۆپەراسیۆنێکی "قارەمانانە و ناوازە"ـی هێزە ئەمنییەکانی عێراق دا، والیی داعش لە عێراق و هەشت فەرماندەی باڵای رێکخراوەکە کوژراون.  

 

سوودانی رایگەیاند، ئۆپەراسیۆنەکە لەلایەن هێزی دژەتیرۆری نیشتمانی و بە هاوکاریی ئۆپەراسیۆنە هاوبەشەکان لە زنجیرەی چیای حەمرین لە پارێزگەی سەڵاحەدین حەشارگەیەکی داعشی کردووەتە ئامانج. 

 

سەرۆکوەزیرانی عێراق گوتی "تیرۆر شوێنی لە عێراقدا نابێتەوە. تاوەکو حەشارگەکانیان راویاندەنێین و لەنێویان دەبەین، تاوەکو خاکەکەمان لە کارە چەپەڵەکانیان پاکدەکرێتەوە."