بەڕێوەبەری گشتیی بەنداوەکان: بەراورد بە پار 1.5 ملیار مەتر زیاتر ئاومان گلداوەتەوە
رووداو دیجیتاڵ
بەڕێوەبەری گشتیی بەنداوەکانی هەرێمی کوردستان دەڵێت، ئەمساڵ بەراورد بە هەمان رێککەوتی ساڵی رابردوو، ئاستی ئاوی گلدراوە زیادیکردووە.
لە هەرێمی کوردستان سێ بەنداوی گەورە و زیاتر لە 20 بەنداوی بچووک و گۆماوی دەستکرد هەن بۆ گلدانەوەی ئاو. تەنیا بەنداوەکانی دووکان، دەربەندیخان و دهۆک بۆ توانای گلدانەوەی زیاتر لە 10 ملیار مەتر سێجا ئاو دروستکراون.
رەحمان خانی، بەڕێوەبەری گشتیی بەنداوەکانی هەرێمی کوردستان بە تۆڕی میدیایی رووداوی گوت: "ئاوی گلدراو لە هەرێمی کوردستان بەراورد بە هەمان رێککەوتی ساڵی رابردوو ملیارێک و 650 ملیۆن مەتر سێجا زیادیکردووە."
ئەوە لەکاتێکدایە، بەگوێرەی ئاماری کەشناسیی هەرێمی کوردستان، جگە لە سلێمانی، لە سێ پارێزگاکەی دیکە ئەم وەرزەی بارانبارین بەراورد بە وەرزی بارینی رابردوو، دوو هێندە و زیاتر باران باریوە.