دهۆک؛ ئاوی ژێر زەوی لە چەند ساڵی رابردوودا 10 - 30 مەتر دابەزیوە

 

 

عەبدولمەجید عەبدوڵڵا، بەڕێوەبەری ئاوی ژێر زەویی پارێزگای دهۆک بە رادیۆی رووداوی راگەیاندووە، "ئاستی ئاوی ژێر زەویی دهۆک بەگوێرەی ناوچە جیاجیاکان لە چەند ساڵی رابردوودا 10 - 30 مەتر دابەزیوە." ئاماژەی بەوەش دا، تەنیا ساڵی رابردوو لە دهۆک 2.5 مەتر ئاوی ژێر زەوی دابەزیوە، لە ئاکرێیش نزیکەی چوار مەتر و لە زاخۆیش نزیکەی پێنج مەتر دابەزیوە.

 

بەڕێوەبەری ئاوی ژێر زەویی پارێزگای دهۆک ئاشکرای کرد، ئەمساڵ زۆر داوای لێدانی بیر کراوە و هەر لەدوای جەژنەوە زیاتر لە 10 داواکارییان بۆ چووە و زۆربەی داواکارییەکانیش بۆ بیری کشتوکاڵین بۆ ئاودێران.

 

بە گوتەی عەبدولمەجید عەبدوڵڵا، "نزیکەی 15%ی خەڵکی دهۆک پشتیان بە ئاوی بیر بەستووە. بەگوێرەی زانیارییەکان 10 بیر وشک بوون و ئاستی ئاوی نزیکەی 400 بیریش دابەزیون." ئەوەیشی خستەڕوو، لە پارێزگای دهۆک وشکەساڵی زیاتر کاریگەریی لەسەر ئاکرێ و رۆڤیا هەبووە.

 

بەپێی ئاماری بەڕێوەبەرایەتیی ئاوی ژێر زەویی پارێزگای دهۆک، لەو پارێزگایەدا زیاتر لە 4000 بیر هەن کە زۆربەیان لە شێخان، ئاکرێ و بەردەڕەشن و زۆرینەیان بۆ ئاودێری بەکاردەهێندرێن.